Omukuluntu gopolisi moshitopolwa shaShana Naftal Lungameni nakakukutu komatanga gopolisi moshitopolwa shaShikoto Komufala Teopolina Kalompo-Nashikaku oya talele po Omukwaniilwa goshitunda shaNdonga pOmbala pOnambango mEtitatu.

Aakuluntu yopolisi miitopolwa moka iyali ayehe opo ya li yu ulikwa nokutameka iilonga miitopolwa yawo moka. Okwa li ya indile omukwaniilwa Fillemon Shuumbwa Nangolo opo yambekelwe  okulonga momudhingoloko gwOndonga.

Nangolo okwa li a zimine nokutaamba ko eyindilo lyaakuluntu yopolisi yiitopolwa mbyoka iyali.

Shika osha li sha ningwa esiku kwa li taya tseyathana nokutotha mo nkene ye na okulongela kumwe.

Aakuluntu yopolisi mboka okwa li ya pewa iipundi yokulela iitopolwa iyali omwedhi gwa yi.

“Otatu indile epitikilo opo tu kale tatu longo momundhingoloko gOndonga, ngoka gwa dhingolokwa kiitopolwa yetu iyali,” taya indile.

Ya ti shoka oye shi ningi omolwa ya hala okutula po elandulathano oshowo okulwitha iimbuluma miitopolwa mbyoka iyali.

Shuumbwa okwa ti, iitopolwa mbyoka oya manguluka okulonga iilonga yawo.

“Otandi indile wo natango aakalimo yomOndonga ya longele kumwe nopolisi uuna tayi longo iilonga yawo,” ta kumagidha ngaaka.

Aakuluntu yopolisi oya popi kutya oya ilongekindha okulwitha iimbuluma oshowo okutula po elandulathano.

Opolisi oya londodha oshigwana opo shi ikaleke kokule niimbuluma.

Ya ti, oya ilongekidha okulwitha iimbuluma oshowo okutaalela omaupyakadhi taga ka holoka.

“Otatu ka gwanitha po iilonga yetu ngaashi naanaa twe yi inekelelwa, elalakano okukaleka po ombili moshigwana,” ya popi ngaaka.

Taya popi kutya iitopolwa oya ilongekidha lela, yo itayi ka thiga nando emanya lya londa kekwawo.

– vkaapanda@nepc.com.na