Opolifi moshitukulwa shaKaras otai konakona oshibofa shokaana keedula 11 vati ka kwatwa komavele nokomatako komukeleli womaliko pofikola yavo pefimbo kwa li ka kofa.

Oshiningwanima eshi osha ningilwe momafiku 20 omwedi ou lwopotundi 02h00 modoolopa Keetmanshoop ashike opo sha lopotwa Etivali loshivike eshi.

Omukonakoni woimbuluma wopolifi moshitukulwa shaKaras omupedu Commissioner Nicodemus Mbango okwa hokolola ta ti okaana oko ke li mondodo onhi-5 okwa li ka kofa komuhandjo wofikola na vakwao.

Vati omukeleli womaliko okwa ya momuhandjo wovanafikola mokati koufiku ndele tai monduda younona nokupamadala okaana komavele nokomatako. Opolifi oya hokolola tai ti okaana oka penduka mo ndele ka kuu nokonima matrona wavo okwe uya ashike vati matrona monduda okwa hanga mo omukeleli womaliko oo. Vati eshi omukeleli womaliko a pulwa okwa ti ota ninga omapekapeko momuhandjo wovanafikola ngeenge omu na ookalyamupombo. 

Okudja opo okaana oka hokolelela matrona fiyo tava lopotele opolifi kombinga yoshimungu eshi.

Opolifi oya hokolola tai ti omukeleli womaliko oha i shito komuhandjo wovanafikola ngeenge ta ka ninga omapekapeko nokuleka po eameno lounona komuhandjo.

Opolifi oya ti fiyo opapa omufekelwa ou ina kwatwa po shaashi opolifi ina i mana natango okuninga omakonakono onghee omukeleli womaliko ou ota twikile noilonga yaye pofikola opo.

fhamalwa@nepc.com.na