Victoria Kaapanda

Olukongo lwaAlbertina Jason (23) ngoka a li a ningi esiku ta kongwa kopolisi nokaakwanezimo lye taku tiwa okwa kana olwa hulu onga okahokololo kuunamambo, sho oye a adhika nokanona koomwedhi ndatu hoka ka yakwa iiwike iyali ya piti koTsumeb.

Otaku hokololwa kutya Jason, ngoka a tseyika wo nedhina Tina okwa li a zi maandjawo koTsumeb, ta ti otayi kukuume ke komiihole kOshakati, ashike hoka ina thika ko. Shoka anuwa okwa li sha tula aakwanezimo momalimbililo nokulopota kopolisi.

Aakwanezimo anuwa oya lombwele opolisi kutya omukwanezimo gwawo ngoka megumbo okwa zi mo nomukiintu gumwe e na ohanona yomweedhi.

Ehokololo lyaakwanezimo olya etele Jason, oshoka opolisi oya kwatakanitha ehokololo lyokanona ka kana moTsumeb naandjoka lyomukiintu a kana okuza esiku a ihulwa kaakwanezimo lye e li pamwe nomukiintu e na ohanana.

Sha ikolelela kopolisi yaNamibia, Jason okwa li a kwatwa po opamwe nayakwawo yaali, Lydia Kaunehafo Shimbilinga (21), a yambukile kOnheleiwa moshitukulwa shaHangwena oshowo omumwayinamati [gwaShimbilinga] Natangwe ‘Dinno’ Shatilwe (25) ngoka naye a yambukile kOnheleiwa, ashike oha longo onga omukeeleli gwomaliko koSwakopmund. 

“Jason okwa li a adhika nohanona ndjoka yoomwedhi ndatu momukunda Oshaandja, muuninginino wOshakati, opamwe nayakwawo mboka yaali. Okanona oka li ka talika koondohotola nodha kwashilipaleke kutya oke li li nawa,” opolisi ya hokolola.

Ayehe okwa li ya holoka lwotango mompangulilo yamangestelata moTsumeb, taya tamenekelwa ekwatombyambyona. 

Oshipotha shawo osha undulilwa komasiku 17 gaAguste nuumvo.  

Sha ikwatelela komukuluntu gomauyelele mopolisi moshilongo Kauna Shikwambi, oshiningwanima shoka okwa li sha holoka moTsumeb moshitopolwa shaShikoto, pehala tali ithanwa United Nations Park iiwike iyali ya piti. “Otaku hokololwa kutya ohanona ndjoka oya li ya yiwa nayo komulumentu nomukiintu kaaye shiwike konima ya li ya ithana yina yohanona koTsumeb, opo ye mu pe iilonga,” ta hokolola ngaaka.

Ta ti, omukiintu ngoka gwomimvo 18, okwa li a dhengelwa ongodhi komukiintu ngoka, ta ti na londe ombetsa a ye koTsumeb, oshoka oya hala oku mu pa iilonga yomomagumbo. 

“Omukiintu ngoka a yambukile momukunda Onheleiwa, moshitopolwa shaMusati okwa li anuwa ya tsakanene naantu mboka yaali pomahooli goPuma moTsumeb,” ta hokololo ngaaka. 

Ta popi kutya naku mu ithana gwomukiintu ngoka anuwa okwa li a lombwele yina yohanona kutya edhina lye oyeTrespo. Ta ti, oya li ya zi po pomahooli e taya yi kehala hoka United Nation Park, hoka anuwa Trespo a li a gandja oshimaliwa N$400 opo anuwa a ka lande iikulya ye.

“Omukiintu ngoka anuwa okwa li a thigi po omona omanga kwa li ta ka landa iikulya, nokwa li a thindikilwa komulumentu ngoka a li naTrespo,” ta ti ngaaka. Shikwambi ta ti, omanga kwa li taya ende yu uka ngeno koositola, omulumentu ngoka anuwa okwa li a kana po, ihe kakwa li a mona kutya okwa yi peni.

“Omukiintu ngoka anuwa okwa li a kwata mbala otaxi, a shune hoka a li a thigi okanona ke ashike mpoka eka thigi ineka adha po, naantu mboka eya thigi nako ine ya adha po,” ta hokolola.

Okwa li anuwa a tameke okukonga nokulilagana. Oshigwana sha li sha tondoka nokupulakena, nopolisi okwa li ya dhengelwa meendelelo.

- vkaapanda@nepc.com.na