On g w e d i v a - O m k u l u n h u f i k o l a pofikola i li moshitukulwa shaShana okwa tewa moilonga eshi ouministeli wehongo va ti wa dimbulula kutya okwa longifa eembapila doikengelela konima eshi a ninga efimbo lile a faula moilonga.
Pefimbo a tewa moilonga, Elizabeth Nghiwilepo okwa hangwa ta longo onga omukulunhufikola kOupumako Combined School, ashike vati ekengelelo okwe li ninga mo2020 pefimbo a li omuhongi koLimbadungila Combined School moshitukulwa shaHangwena.
Otaku hokololwa Nghiwilepo a monika ondjo eshi vati a yandja ombapila yepopilo landohotola ihe fi yoshili pokati komafiku 7 Juli no28 Aguste 2020.
Omunambelewa omukulunhu moshikondo shehongo, Sanet Steenkamp okwa koleka koNew Era kutya omalihumbato aNghiwilepo okwa li e li kondje yeeveta doilonga yepangelo.
Ta ti Nghiwilepo okwa dopa okulihumbata ngaashi shi li mokatendo komilandu ka tulilwa po ovanailonga vepangelo ye okwa dopa yoo oku lihumbata moshili.
Steenkamp ta ti Nghiwilepo okwa kufwa moilonga pambelewa momafiku 19 Januali 2023.
Ashike Nghiwilepo pauyemwene okwalombwelaomutoolinghundana ou kutya ye ina uda ngeenge okwa taatawa moilonga.
Okwa anya yoo okuweda ko sha.
Otaku hokololwa Nghiwilepo oo a tameka okulonga onga omukulunhufikola pOupumako petameko lodula ya dja ko a li a pewa ombapila yekufomoilonga komutalelifikola wavo.
Ashike eyelo laye moilonga ola eta omalipulo ngeenge ohaku ningwa tuu omapekapeko ngee taku kutwa ovahongi moilonga, ile omolwashike mbela ouministeli wehongo u na okuyelayela omunhu omanga e na oshibofa inashi pwa.
Omukulunhu wehongo mOshana Hileni Amukana okwa anya okutya ko sha koshinima shaNghiwilepo, ta ti eshi oshinima shopaumwene.
“Ihandi kundafana oinima yopaumwene noshiwana ashishe,” Amukana ta ti.
Kofikola Limbadungila Combined School oko kwa dja Nghiwilepo omanga ina ya kOupumako, oko ngoo kwa dile omuhongifikola Fransina Mwetufa oo kwa li sha monika mo kutya okwa kala ta longo needjapo dokoUnam doikengelela.
Mwetufa okwa li a ningilwa omapekapeko kouministeli konima eshi va ti a twa nombele omunailonga pamwe naye noku mu ningila omatilifo.
Omukainhu oo okwa li a longa poLimbadungila okudja momudo 2019 fiyo omo 2021. Fiyo opapa Mwetufa vati oku li modolongo.