Omukulupe weedula 60 okwa kengelelwa eshi oshimaliwa shaye sha nanwa ko kombaanga yaye yomavalulilo yoBank Windhoek. Oshimbuluma eshi osha ningwa Olomakaya mOndangwa.

Inspector Thomas Aiyambo wopolifi yaShana okwa hokolola ta ti omukulupe ou okwa li a ya meni lombaanga yoBank Windhoek kOndangwa opo a ka nane oshimaliwa potundi 10h30.

Aiyambo okwa ti konima yominute di li 10 omukulupe eshi a dja kombaanga ou okwa dengelwa kongodi konomola yopaumwne vati tai mu lombwele kutya okwa findana okalityaatya ka-MTC.  Okudja opo okwa lombwelwa a yandje onomola yaye yomavalulo ombaanga yaye opo vati a tuminwe okalityaatya aka a findana komavalulilo ombaanga yaye.

Aiyambo okwa hokolola ta ti lwopo13h00 omukulupe okwa tokola opo a shuneko kombaanga oko.  Eshi a fika kombaanga okwa lombwelwa kutya oshimaliwa shaye shi fike N$100 000 osha nanwa ko komavalulilo ombaanga yaye.

Opolifi oya ti kape na ouyelele washa kutya oshimaliwa osha kufwa ko kulyelye, onghee omufekelwa ke shiivike manga.

Oshiningwanima shii vali sha ningilwa omukulupe osho sho Johannes Amunime weedula 63 a fya eshi vati a dengwa komufekelwa ehe shivike komukunda Onheleiwa mOngwediva. 

Aiyambo okwa hokolola ta ti omukulupe ou okwa li a ya koundingosho Etitano lwopotundi 13h00, ashike efiku olo keumbo ina alukila ko.

Aiyambo okwa ti Amunime ou okwe lituwa moshana ongula yOlomakaya kokaana kaye kokadona, e li omutumba medu nolutu la twima ondwi nayi. Okwa hokolola ta ti omukulupe oku na okukala  a dengwa noshinima shikukutu komutwe shaashi okwa dinda neenghono, yee okwa li ta ti kutya oku udite ta vele nokofingo.

Amunime ou vati eshi kwa li ta hokolola ota ti ita dimbuluka kutya oshike sha ningwa po ile okudimbuluka ou e mu denga ngaho.

Okwa twalwa koshipangelo shepangelo shaShakati efiku olo lOlomakaya opo a ka mone epango lopaunamiti. Amunime okwa xulifa Omandaaxa moshipangelo shaShakati. Omakonaakono opolifi otaa twikile.