Omukulupe gwomimvo 93, ngoka ha kwatelwa openzela ye kumushiinda okwa ti okwa hala okakalata ke ka galukile kegumbo oshoka ota si ondjala.
Ndasuunye Natalia Mwahafa omukalimo momukunda Okanghudi kaMokaxwa moshitopolwa shaHangwena opamwe naanegumbo lye otaya lili ondjala noluhepo, nonando oha mono oshimaliwa shepangelo.
Omutekulu gwe ngoka e li naye megumbo edhina lye inaa hala lyi tumbulwe, ota hokolola kutya yinakulu okwa ningi esiku a kwatwa kuuvu naasho e mu fala koshipangelo, okwa li a monika e na omukithi gwondjala kundohotola.
Mokakalata koshipangelo komukulupe hoka ka monika komutoolinkundana nguka, otaka ulike kutya omukulupe nguka sho a li i ihulu koshipangelo momasiku 20 omwedhi nguka okwa li ta vihi owala ookilogalama 31.4. Ndohotola okwa nyola kutya okwa pumbwa okulya iikulya tayi tungu olutu.
“Sho wa tala ndje ngeyi, ohandi li uuna pe na sha shokulya. Kandi na noongaku, tala egumbo lyandje sho lyi li, onda fa ngaa handi kwata openzela ngame?” ta popi neyeme.
“Okakalata kandje kokukwata openzela kandi shi mpoka ke li, onde ka kuthwa nalenale. Nena ongame nguka tandi si ondjala,” ta nyenyeta ngaaka.
Ta ti, oha kwatelwa openzela kaantu yamagumbo omanga e na aatekulu ye ye li megumbo.
“Uuwanawa wopenzela yandje kandi wu shi, naya ete uuthemba wandje awuhe, wu kale megumbo, opo ndi kale tandi landa shoka omwenyo gwandje gwa hala,” ta popi ngaaka.
Mwahafa okwa kalelwa kaatekulu ye li 12 mboka ye li megumbo kaaye na iiyemo yasha.
Omutekulu gumwe okwa popi ta ti, yo inaya hala openzela yayinakulu, ihe oya hala ashike omukulupe a silwe oshimpwiyu noshimaliwa she shoka ha mono kepangelo.
“Otashi sitha ohoni, kuku a monika omanyutu omanga ha mono openzela, oshike oshimaliwa she itashi mu landele iikulya ya gwana,” ta pula ngaaka. Pethimbo ndika okwa ti, megumbo kamu na sha shokulya kakele kehela lyuusila. Ta ti, otaya idhidhimikile ashike mokatete kaake na osuuka, sigo omwedhi gwa si, pamwe taya silwa ohenda.
Ta gwedha po kutya ohashi mu uvitha nayi, ta nyanga okupa yinakulu okulya, nonando ke na iilonga, ihe yinakulu oha mono openzela.
“Otwa kala twa hala okulopota oshinima shika kumwene gwomukunda, ihe osha kala oshidhigu oshoka mee gwePriscila Lukas ngoka ha taamba openzela Mwahafa oye amushanga gwa mwene gwomukunda,” ta popi ngaaka.
Ta ti, uuna iikulya ya pu mo megumbo, omukulukandhi ngoka iha kala a hala okulandulula iikulya, oshoka anuwa aatekulu otaya lipo iikulya yomukulupe.
“Uuna ta landa iikulya, oha landa ashike oshako yimwe yuusila yookilogalama 50, ekende lyomagandhi lyo750ml, okapalasitika koontangu oshowo oothewa,” ta hokolola ngaaka.
Lukas, ngoka ha kwatele omukulupe oshimaliwa okwa ti, aluhe ta landa iikulya yomukulupe oha ulike shoka a landa, no ngele okwa hupu oshimaliwa, oheshi gandja komukulupe nenge kaatekulu.
“Onda kwatela omukupe ngoka omimvo mbali netata paife, ihe ohandi kutha ko ashike N$1000 lyoompumbwe dhawo dho megumbo, ko kombaanga taku kala N$300, oshoka oha kwata N$1 300.
Ngaashingeyi kombaanga yomukulupe okuna oshimaliwa shi vulithe N$3000, ihe otwa kala hatu kutha ko oshimaliwa uuna pena oshituthi sho ntumba kutya oshenyanyu nenge oshuuwinayi” ta fatula ngaaka.
Ta ti, ngele omukulupe kena sha oongaku dhoku zala, kena ontseyo, okushi ashike kutya opena ondunda yimwe ndyoka ya li ya pya po, no mwa pila iinima yomukulupe yimwe.
“Oshinakugwanithwa shika okwa li ndeshi pewa komona gomumati, a valwa komumwayina gomukulupe, Malakia Kashume, ngoka e li kOvenduka, konima a li adhimbulula kutya openzela yomukulupe ihayi mulongele sha,” ta hokolola ngaaka.
Ta ti, onda li nda fundju aatekulu mboka ye li megumbo kutya hangaye ndina okakalata kokukwata openzela yomukulupe oshoka, oya kala noku tukagulandje.
Kashume ngoka anuwa a gandja oshinakugwanithwa komushinda a kwatele yina, omumwayina gwayina openzela okwa ti, aatekulu ye mboka ye li megumbo kayena elandulathano. “Openzela ndyoka oya kala hayi kwatwa nale kaashinda yamwe, hoka kwa li ndeyi lundulula opo yi kale hayi kwatwa kuLukas, oshoka hoka ya li hayi kwatwa tango, omukulupe ka kwa li ha silwa nande oshimpwiyu” ta popi ngaaka.
Ta gwedhapo kutya, omukulupe ngoka okwa taalela onkalo ondhigu megumbo, oshoka aatekulu mboka iha ya sile omulupe oshimpwiyu nando. Ta ti, ihaye mutelekele, onkene omukulupe megumbo ohazi mo taka konga otombo kuundingosho hoka natango anuwa ha tutile uusila uuna a hala okupewa ehalasa lyotombo, uuna keena oshimaliwa.
“Otandi pandula Lukas ngoka ta tambula openzela yomukulupe oshoka no kombaanga ye okuna ngaa sha sha gongelwa,” ta pandula ngaaka.