Opolisi moshitopolwa shaShana oyili metifa okukonakona oshipotha sha patulilwa omukiintu anuwa agandja N$174 824, konganga, opo a kale ha mono iimaliwa oyindji.
Omugandji gomauyelele gopolisi moshitopolwa shaShana Thomas Aiyambo okwa ti, omukiintu ngoka anuwa okwali a longitha iimaliwa mbyoka ethimbo lya yooloka.
Ta ti, iimaliwa mbyoka okwali eyil ongitha okuza po kati komasiku 12 gaOkotomba sigo 23 Novomba nuumvo.
“Katu na natango uyelele wothaatha kutya, iimaliwa okwali heyi gandja kondundu yini, no ngele okwali a mono iimaliwa mbyoka, ngaashi ali eshi lombwelwa kunamunganga,” Aiyambo ta ti ngaaka.
Otaku hokololwa kutya omukiintu ngoka gomimvo 33, okwa yambukile komukunda Okaandje, mOngwediva.
“Iimaliwa mbyoka okwali eyikutha, moshiketha shiimaliwa mondunda yomanwino, yedhina Tafel Bar, mOkandjengedhi,” ta ti ngaaka.
Aiyambo ta ti, omukiintu ngoka okwali ha longo mondingosho ndyoka.
Opolisi moshitopolwa shaShana oya kumagidha oshigwana shi kale sha kotokela ookalyamupombo, mboka taya yugu aantu iinimayawo, nuunene oohauto dhawo.
Moshipotha sha yooloka kushikwao, Omukuluntu gwopolisi moshitopolwa shaShana Rauha Amwele okwa ti, iipotha yoohauto tayi yugwa aakwashigwana moshitopolwa shawo, oyuuka pombanda.
Omuhingi gotakisi gomimvo 41, anuwa okwaningi omunelago sho kwali a ponokelwa kaafuthi yaali mboka ali a londoke, yafa ookasitoma.
Aiyambo okwa hokolola ta ti, aalumentu mboka yaali okwali ya londekwa okuza kolukanda uupindi, taya pulwa ya falwe kolukanda Evululuko.
“Sho yali ya thiki pehala ndoka ya pula, okwali ya pula natango ya falwe komeho, hoka omushingi atindi, okuya,” ta hokolola.
Anuwa okwali a kwatwa okuza konima pothingo ku gumwe, omanga omukwawo ta kondjitha okuthikamitha ohauto. Ta ti, olugodhi okwali lwa sakala po pate mpoka, sigo omuhingi a pondola okukutha ko ombele ndyoka ali a kuthilwa kaafuthi, noku tsa po gumwe, oshowo okuya dhengagula.
Ta popi ta ti, sho yali ya mono kutya olugodhi itaye lu pondola, okwali ya tondoka po nonando gumwe okwali a ehamekwa. Aiyambo, ta ti, opolisi sho ya thiki, okwali ya landula oompandhi, sigo ya mono ngoka ali atsuwa shi nyanyaleka, komuhingi. Otaku hokolwa kutya okwali aadhika alala, oshoka okwapu oonkondo, kombinzi a kanitha.
Okwali a falwa koshipangelo, nongaashingeyi okuli mo make gopolisi.