Iitopolwa yokuumbugantuninginino onkene tayi tsikile okumbugalekwa komililo dhepeya. 

Omulilo otagu tsikile okukala uupyakadhi oshilongo ashihe, nongashiingeyi ogwa lopotwa gwa hanagula ombinga yimwe yehala lya gamenwa lyiiyamakuti Etosha.

Etosha okwa li kwa lopotwa lya pya ohekta 487 732 nuumvo.

Otaku hokololwa kutya omulilo ogwa li gwa pimbile unene okuza poomwedhi ndhika dhahugunina dhokomumvo sho ku na ombepo.

Omililo ohagu taandele mbala oshoka omwiidhi ogwa kukuta nogwa ningi ogundji  sho omvula ya li ya loko nawa omumvo gwa yi.

Okwa lopotwa omulilo gwa fike omahala oohekta oomilliona 2.5 oshilongo ashihe momumvo muka.  

Omukalimo gwomomukunda Oponona Jesaya Shilongo   okwa ti, omulilo ngoka okwa li gwa yaka kombuga, ogwa hanagula po ohambo ye. 

“Shika oshinima hashi holoka aluhe omumvo kehe pethimbo ndika. Omililo ohadhi holoka pamukalo dha yooloka, nonando olundji ihaku shuwika shoka sha  eta omililo dhimwe,” ta ti ngaaka.

Ta ti omulilo ohagu halakanitha po uushitwe oshowo okumbugaleka ombuga, moka omo hamu hupilwa kiimuna yaakwashigwana.

“Komakuti hoka oku na oohambo odhindji, nohashi kala aluhe uupyakadhi uuna kwa holoka omulilo oshoka iimuna nomalukalwa getu ohaga hanagulwa po komililo,” ta popi ngaaka.

Shilongo ta ti, omililo ndhoka  otadhi vulu oku eta ondjala, niimuna tayi si po.

Kansela gUuvudhiya Timoteus Shivute okwa ti, nonando omulilo gwa li gwa ponokele oshikandjohololo shawo omwedhi gwayi, omulilo nguka gwa hugunina inagu thika ko kuyo.

“Petameko lyomwedhi nguka Shivute okwa li a popi kutya, omulilo ohagu etwa unene ko kwaakwata nawa omulilo, onkene ohagu taandele mbala eta gu fike, omolwa ombepo,”a fatulula ngaaka.