Victoria Kaapanda

Omuloka omwaanawa onkene tagu tsikile okuga tila pevi miitopolwa yilwe yokuumbangalantu woshilongo oshowo miitopolwa yilwe konooli.

Sha ikwatelela kolopota ya pitithwa komalungula kombinga yomvula meni lyoshilongo, oondoolopa ngaashi Koes okwa monika omuloka gwa yalulwa sigo 65mm Olyomakaya, omanga Mariental a mono o50mm. Tsumeb oya mono omuloka 70mm Omaandaha, omanga oofaalama dhopopepi dha lokwa shi thike po 53mm, nadhimwe momundhingoloko gwaShikoto dha mono omuloka sigo 80mm.

“Omvula oya loko natango moshitopolwa shaTjozondjupa ya yalulwa 100mm Osoondaha,” ya shanga ngaaka. Sha ikolela koonkundana okupitila miikundaneki ya yooloka, oopate ndhimwe kOrange sigo onena odha tetwa ko, omolwomoloka omunene gwa holoka momundhingoloko moka. Oshitopolwa shaShikoto monooli, osha lopotwa sha lokwa nawa mehuliloshiwike.

Selma Kapolo gOmomuthiya okwa ti, oya kala taya lili omvula ethimbo ele, ihe nena otaya pandula.

“Shiyenga okwe ga dhenge pevi nawa Osoondaha. Se mboka kwa li twa tameke okulonga omapya getu kuyele, iilya yetu otayi ulike nawa lela,” ta popi ngaaka. Ta ti, mboka ya adhika ya pulula omapya gawo omasiku ngaka, oya ningi aanelago sho iilya yawo ya landulilwa mo komuloka omwaanawa. “Otatu  tsikile okugalikana omoloka gu tsikile okuloka nawa, opo iiya yetu kaayi ka sepo komutenya,” ta popi ngaaka. Ta ti, otashi ke ya pula oshimaliwa oshindji, oku ka longululula omapya gawo. “Ta ti, iitopolwa mbyoka inaayi mona omuloka natango, inayi sholola, omvula oko yi li nuumvo,” ta gandja omukumo kaanafala aakwawo. Nonando aantu oya ipyakandhila nokulonga omapya gawo miitopolwa ngaashi Omusati nOshana, okuza mehuliloshiwike Shiyenga ine ga dhenga pevi miitopolwa moka.

Aina Matti gomomukunda Iihanguti moElim okwa ti, opo a pulula Etiyali, ihe natango epya lye inali kuta.

“Ondi na omukumo kutya sho tandi ka mana okukuna, nomvula otayi tameke okuloka nawa,” ta ti ngaaka.

– vkaapanda@nepc.com.na