Omukiintu gwomimvo dhopokati oku li monkalo tayi limbililike  moshipangelo shaShakati, sho a hahalwa shi nyanyaleka komusamane gwe, omanga ini imangeleka moshitopolwa shaHangwena.

Sha ikolelela kepeko lyopolisi, omulumentu gwomimvo 43, okwa imangeleke konima yoosenkonde ooshona, sho a hahala omukulukadhi  gwe nekuya uusiku wOlyomokaya momukunda Epembe.

Opolisi oya ti, omulumentu ngoka okwa li a adhika moombuli dhondunda ye yokulala nekuya lye mu kalela, lyi li pevi kee na oombinzi.
Otaku hokololwa kutya aaholike mboka okwa li ya monika pamwe lwahuguninima pehala lyomanwino omutenya gwOlyomakaya ngoka.
Tayi hokolola kutya aashiinda okwa li ya uvu omukiintu ngoka ta kugu okuza megumbo lya wo. 

Aashiinda sho anuwa ya ka thika, oya adha omukiintu ngoka a lala pomweelo gwondunda yawo yokulala, niilalo yi li momutse. Otaku hokololwa kutya, okwa li a falwa koshipangelo shEenhana tango a ka mone uuhaku, e ta ka tuminwa koshipangelo oshinene shaShakati.
Omulumentu ngoka nakusa paife okwa tseyika nedhina Hesekiel Naftal.

Kape na uuyelele wa gwana kutya oshike sha etitha omanyenyeto pokati kaaholike mboka yaali. Moshiningwanima inaashi faathana omulumentu gwomimvo 31 okwa mangwa po kopolisi shi na sha nonkambadhala yedhipago momukunda Iipumbu moshitopola shaMusati.
Omukuluntu gwopolisi moshitopolwa shaMusati Titus Shikongo okwa ti, oshingwanima shoka osha holoka pokati kamwayinathanamati sho anuwa kwa li taya kondjele ekaya lyokuhila.

Shikongo ta ti, aalumentu mboka tango okwa li ya dhengathana noongonyo, nokonima yethimbo nakufekelwa moshiningwanima shika, okwa li a hingi ohauto ye, ta tidha mumwayina e te mu pumu nohauto.
Ta ti, omulumentu ngoka tango okwa li i idhenge mekende lyohauto e ta idhenge pevi. 
Otaku hokololwa kutya, okwa li a mono oshiponga unene, nokw ali afalwa koshipangelo shaShikuku.