Victoria Kaapanda

Omunafaalama gwoondjuhwa okwa kumagidha aanyasha ya nyangadhale konima yeilongo lyawo, peha lyokukuutumba momagumbo. Selma Sebbson oku na oshikuku shoondjuhwa dhi vule 200, ihe kehe esiku komwaalu gwoondjuhwa ohaku gwedha.

“Onda tameke ongeshefa yandje yoondjuhwa osho wo omayi oomvula ndatu dha pita, nonando ethimbo ndika oongeshefa  moshilongo itadhi ende nawa omolwomukithi gwoCovid-19, otatu endekele ngaa, hu itaku ziya,” Sebbson   ta popi ngaaka. Okwa kumagidha ta ti, uuwanawa ihawu zi pokapala kayela. Aanyasha inaya kala we ya tegelela okupewa iilonga kepangelo omanga taya vulu okulongitha uunongo wa wo yene.

“Sho nda tameke ongeshefa ndjika, okwa li nda tameke noondjuhwa 30, ihe nena ondi na oondjuhwa dhi vule 200.  Oondjuhwa ohadhi pe ndje omayi ngoka handi landitha,” Sebbson ta ti, ngaaka. Omunafaalama gwoondjuhwa okwa ti, ongeshefa ndjoka oya  ikolelela  muyo, okuhupitha aakwanezimo.

Ta kumagidha ta ti, oshimaliwa ihashigwana, ihe okashona hoka to mono okutula omboloto poshitafula, oke vule owala. Sebbson okwa ti, ongeshefa ohayi humu komeho uuna to yi kaleke po ngoye mwene, oondjuhwa ohadhi pula iikulya, oshowo omiti.

“Ohandi lonigitha N$900 kehe konima yomasiku gaali okulanda ooshako mbali dhiikulya yoondjuhwa. Iimaliwa kayi na olwaala, kehe ongeshefa tayi vulu oku eta po oshimaliwa oyi li nawa,” a popi ngaaka. Omunafalama gwoondjuhwa, ta ti etameko aluhe ohali kala edhigu, ihe ngele owuna shi li ohokwe nomukumo mwaashoka wa hala, siku limwe oto keshi pondola.

Liina Shakuza ngoka a mana eyilongo lye omvula ya zi ko moshiputudhilo shuulongi mOngwediva okwa  ti, manga ta kongo ilonga yonzapo ye, ota landitha manga uukwashikependjewo pegumbo.

Shakuza  oku na okatala kiihulunde ta landitha pegumbo. Shakuza  okwa popi ta ti, iihulunde mbyoka ha landitha oha mono mo iimaliwa yokulanda oothewa oshowo oku eta omboloto poshitaafula. “Ongula kehe omanga inaandi ya kiilonga yandje mbyoka, ohandi piti tandi ka konga iilonga yandje, ihe ondi na omukumo kutya esiku limwe, kemanya otaku ka za ontsi,” Shakuza  ta popi nomukumo.