Omuniilonga gwokuopaleka posikola yimwe mOkahao, omukiintu gwomimvo 34, ngoka ta fekelelwa edhipago lyohanona ye okwa mangwa po.
Oshiningwanima shoka osha holoka oshiwike sha zi ko momukunda Ondukuta momundhingoloko gwaTsandi.
Ohanona ndjoka oya tengenekwa yi na ashike iiwike itatu.
Sha ikolela kuuyelele wa gandjwa komukuluntu gwopolisi moshitopolwa shaMusati Titus Shikongo, omukiintu ngoka okwa mangwa po sha landula olutu lohanona, kwa li lwa itsuwa komuntu kwa li ta ende.
Shikongo ta hokolola kutya olutu lwohanona ndjoka, kakwa li talu ulike omandhindhiliko gasha, lwa dhengwa nenge lwa monithwa iihuna.
Okwa li lwa adhika lwa zalekwa iikutu. “Otwali twa gandja etumwalaka lyomeendelelo, opo ku kongwe ngoka aningi oshinigwanima shoka,” ta ti ngaaka. Okwali kwalopotwa kutya, opena omukiintu ngoka okwali a monika eli metegelelo, ihe okwa ka monika ishewe keena ohanona, ye keeli metegelelo.
“Sha ikolela komakonakono go petameko ga ningwa kopolisi, okwali kwa konekwa kutya omukiintu ngoka okwali a imonitha okanona ye mwene momasiku 23 gaDesemba omvo gwa yi, kaape na ngoka e shishi e ta kala nohanona mondunda ye, sigo omasiku 7 Januali,” ta hokolola ngaaka.
Ta gwedha po ta ti, omukiintu ngoka okwali a falwa koshipangelo a ka konakonwe oshowo okukoleka omakonakono gopolisi.
Omukiintu ngoka okwakalekwa mondholongo. Otaku hokololwa kutya okwa yambukile komukunda Onawa moshitopolwa shaMusati.
Opolisi otayi tsikile okukumagidha aavali ya hulithe po okulonga iilonga yinyanyaleka moshigwana.
“Kape na ngoka teku manga po ngele owa ti, ito vulu okutekula okanona koye, omolwa omatompelo gontumba,” ta popi nongeyo.
Endhipago oli na ondjo koshipala shOmuwa, onkene kambandhala wu thike mpoka pe na aantu taya vulu okuyambindhindha, pehala lyokulonga iionga iiwinayi.
Endhipago oshowo oku ekelahi oohana, nawo uupyakandhi wa ndhindhilikwa moshilongo tau ende tau indjipala.
– vkaapanda@n3epc.com.na