New Era Newspaper

New Era Epaper
Icon Collap
...
Home / Omutengenekwathaneko gwoshimaliwa gwomumvo 2021/22 gwaa piti nelalakano lyeyambulepo lyeliko

Omutengenekwathaneko gwoshimaliwa gwomumvo 2021/22 gwaa piti nelalakano lyeyambulepo lyeliko

2021-03-19  Victoria Kaapanda

Omutengenekwathaneko gwoshimaliwa gwomumvo 2021/22 gwaa piti nelalakano lyeyambulepo lyeliko

Minista gwemona Iipumbu Shiimi okwa ti oku na omukumo kutya onakuyiwa yeliko lyoshilongo otayi ulike ya ziza nawa. 

Uunambo, sho a pititha ontengenekwathaneko yoshilongo, Shiimi okwa ti omumvo gwoshimaliwa 2020/2021 kakwa li nande omupu, oshoka Namibia okwa li a ponokelwa komaupyakadhi ga yooloka ngoka ga shunitha eliko lyoshilongo
pevi.

“Nando twa ponokelwa komaupyakadhi agehe ngoka, otu na okuyambula po oshilongo shetu, opo shi hume komeho tse tu opaleke onakuyiwa yOmunamibia kehe,” Shiimi ta ti ngaaka.

Ta gwedha po ta ti, omukithi gwoCovid-19 onkene tagu tsikile okukala uupyakadhi moonkalamwenyo dhoyendji moNamibia oshowo muuyuni awuhe.

“Muuyuni aantu ye vule poomilliona 121 oya kwatwa komukithi gwoCovid-19 omanga ye li oomilliona 2,6 ya hulitha komukithi ngoka,” ta popi ngaaka.

Ta ti, Aanamibia ye vule 458 oya hulitha komukithi gwoCovid-19.

Shiimi ta ti, omuvo gwa yi eliko lyoshimaliwa olya shuna pevi nopelesenda 7,3, shoka sha talika ko onga ondjokonona oshoka olwo lwotango eliko tali shuna pevi ngaaka.

“Oongeshefa odhindji odha pata, naantu omayovi oya kanitha iilonga yawo omolwa omukithi ngoka,” a popi ngaaka.

Ta ti, omumvo gwa yi sho a li a pititha ontengenekwathaneko yeliko okwa li e yi pititha kohi yoshipalanyolo “Tu lwitheni omukithi gwoCovid-19 atuheni, opo tu gu sinde”.

 

 

“Kakwa li oshipu, ihe otwa kambadhala okuza koombinga noombinga,” ta ti ngaaka.

Minista ta ti, uundjolowele nomwenyo gwOmunamibia kehe otagu tsikile okusilwa oshimpwiyu  nokugamenwa.

Ta popi ta ti, omandiki guundjolowele oga li taga longo neyitulemo opo omukithi ngoka kaagu  taandele.

“Sigo onena moNambia aantu ye vule 41,400 mboka ya li ya kwatwa komukithi gwoCovid-19, ye li 38,500 oya kala nawa,” Minista ta ti ngaaka.

Shiimi okwa gwedha po ta ti, Aanamibia ye vule 769 000 oya li mono oshimaliwa sha li sha gandjwa omumvo gwa yi koshigwana shooN$750  okuza moomiliiona N$576.

Ta gwedha po ta ti, oomilliona dhi li N$468 odha li dha gandjwa kuuministeli welongo, oku opalekulula uundjugo woosikola, oshowo okutunga wumwe uupe oshowo okutunga  noku opaleka omihandjo dhoosikola.

Caption : Minista gwemona Iipumbu Shiimi

Ethano: Emmency Nuukala

 

 

  


2021-03-19  Victoria Kaapanda

Share on social media