Omwaalu gomangundumano ngoka gwali guli po 500, ogwa shunithwa pevi po mwaalu 200, omolwa omwaalu waantu taa ya kwatwa kombuto waguuka pombanda.
Ndhoka odha popiwa komuPresidente goshilongo Hage Geingob sho a li a ningi etseyitho lyomalandulathano omape ga tulwa po okukeelela omukithi gwoCovid-19, ngoka tagu ende gwa uka pombanda esiki kehe moshilongo.
Omukithi gwoCovid-19 otagu ende gwa uka pombanda molweetho nduka olutine, shi vulithe omalweetho ga piti. Olweetho ndika olutine oluna omukithi tagu ithanwa Omicron
“Okangendjo kuusiku pethimbo ndika ita kayi miilongo, oshowo owili dhokulanditha momangeshefelo giikolitha itadhi lunduluka,” ta popi ngaaka.
Geingob otaka popya ishiwe momasiku 15 gaJanuali omvo ta guya.
“Aantu taya gongala piituthi ya yooloka yi na omangundumano naya gwanithe po omalandulathano agehe ga tulwa po okukeelela omukithi nguka gu taandele,” ta kumagidha.
Omukithi ohagu taandele mbala okuza momangundumano, ngaashi naana ngoka haga holoka ethimbo ndika lyokili, mwakwatelwa oohango.
Presidente natango okwatseyitha kutya aahingi yoohauto otaya ka andjanekwa uumasika wuli omilliona yimwe oshilongo ashihe.
Minista guuhaku nonkalo nawa Kalumbi Shangula ota tsikile okukumagidha oshigwana shi ka tuntilwe.
“Okutuntilwa oko ashike taku patukununa uupyakandhi mbuka oshilongo wa taalela,” ta popi ngaaka.
Ta ti, omiti ndhoka kandhina uuwinayi wa sha, no tadhi monika oshilongo ashihe momahala guuhaku.
“Uumaska nawu zalwe nawa ngaashi naana omalombwelo taga ti mokati kaantu, naamboka ye li moohauto ethimbo alihe,’’ Minista a gwedha po ngaaka.
Ta gwedhapo wo ta ti omukithi nguka otagu vulu okulota uuna omalanulathano noompmapngo adhihe tadhi gwanithwa po.
Caption: Omwaalu gomangundumano gwa shunithwa pevi.