Elelo lyondoolopa yaNdangwa olyi li metifa okukuna omiti dhokuopaleka noku eta omizile mondoolopa.

Omugandji gomauyelele melelo lyondoolopa Petrina Shitalangaho okwa  ti elelo otali tsike iimeno yi li 150 mondoloopa ayihe, okuopaleka nokumonikitha ondoolopa nawa, onga eyambulepo lyondoolopa.

“Natango otwa gandja omiti koosikola adhihe mondoolopa yaNdangwa. Kehe osikola oya mono oomiti dhi li hamano,” Shitalangaho ta popi ngaaka.

Ndhoka okwa li e dhi popi esiku ya li ya dhimbulukwa esiku lyiikwamiti, ndyoka hali dhimbulukwa oshiwike oshitiyali shomwedhi gwaKotomba omumvo kehe.

Nuumvo esiku ndyoka okwa li lya ndhimbulukiwa kohi yoshipalanyolo, ‘Okukaleka po iikwamiti, okukaleka po onkalonawa yomuntu.’

Ngoloneya gwoshitopolwa shaShana Elia Irimari okwa ti, inashi simana ashike okuopaleka oshitopolwa shoka, ashike omiti ohadhi dhana wo onkandangala momindhingoloko.

“Omiti odha pumbwa okukunwa odhindji, nu na omililo, omafundja nosho tuu taga ka holoka, ngoka haga vulu wo natango okuhalakanitha omiti, ope na ndhoka tadhi kala po,” ta ti ngaaka.

Iirimari okwa kumagidha oshigwana mondoolopa yaNdangwa shi sile oshimpwiyu omiti ndhoka tadhi tsikwa, nelalakano lyokukaleka ondoolopa yaNdangwa ya opala oshowo okugandja ombepo ya gwana.

Mayola gwondoolopa yaNdangwa Paavo Amwele esiku ndyoka, okwa kumagidha oshigwana shi tsikile okukuna omiti odhindji opo oshigwana shokomongula shi adhe ondoloopa yaNdangwa yi li methano tali hokitha.

“Omiti odha simana, onkene odhi na okusilwa oshimpwiyu opo dhi kalwekwe po. Oshigwana osha pumbwa okukala tashi tsike omiti odhindji, ngaashi naanaa elelo lyondoolopa tali shi ningi.