Omukwaniilwa gOndonga Fillemon Shuumbwa Nangolo okwa ti Elelo lyopamuthigululwakalo gwaNdonga olya kanitha ependa, omumwiidhidhimiki, elenga lyoshikandjohogololo shAmuteya oshowo omukuutumbiki gwelelelo lyopamuthigululwakalo lyOndonga Vilho Sheetheni Kamanya.
Kamanya okwa hulitha molwomukithi gwoCovid-19 mesiku lyahuguninwa lyomumvo 2021.
Okwa hulitha mepipi lyomimvo 74.
Omalongekidho gehupulitho nefumbiko, oge li metifa.
“Kamanya okwa kala oshilyo shelelo lyopamuthigululwakalo okuza momumvo 2002 sigo esiku Omuwa a kutha mo omufudho gwe gwahugunina,” Omukwaniilwa ta ti ngaaka.
Nangolo okwa ti, ezepo lyomunashipundi gwawo olya thigi po omwaka omunene, nomitima dhawo odha dhengwa dha luluma.
“Elelelo lyopamuthigululwakalo alihe olya thigilwa oluhepo olunene, ihe nonando shoka sha holoka, iilonga yaKalunga ihayi patanekwa, ihe otwe shi taamba ko ngaashi shi li,” ta popi newi lyolukeno.
Ta gwedha po ta ti, iilonga a longela oshitopolwa shaNdonga itayi dhimbiwa, ihe otayi kala aluhe momitima dhawo.
Omukwaniilwa okwa gandja omahekeleko komuselekadhi oshowo kaakwanezimo ayehe, ta ti, omwenyo gwe nagu vululukwe nombili.
Ngoloneya gwoshitopolwa shaShikoto Penda yaNdakolo okwa ti, okwa kanitha kuume ke, omuniilonga pamwe naye, omulongi gwe ngoka natango a ka ninga mbushe miilonga.
“Otwa kanitha omuleli. Oshindji otwa kanitha. Ondi shi okutanga uuwanawa a longa oshowo omalongo a gandja moshigwana, nda kwatelwa mo woo,” ta popi ngaaka.
YaNdakolo okwa fatulula ta ti, Kamanya okwa li natango omunapolitika, nokwa dhana onkandangala mekondjelomanguluko lyoshilongo.
“Kamanya okwa li natango oshilyo oshikuluntu mongeleka yaElcin, okwa li omukriste okuudha. Otwa kanitha oshindji kwa li tu na okukala natango twe shi mona notwe shi longwa, ihe ayihe otwe yi gandja miikaha yaKalunga ye mwene,” ta popi ngaaka.
Okwa popi ta ti, Kamanya okwa li wo natango ngoloneya gwoshitopolwa shaShikoto.
“Ondi shi oku mu tanga, ondi na oku mu tanga oshowo uuwanawa a longa owindji notawu hokitha, nonando awuhe itandi wu vulu oku wu mana nena,” ta ti ngaaka.
YaNdakolo okwa gandja omahekeleko kezimo alihe lyanakusa.
-vkaapanda@nepc.com.na