Ongeleka yaCatholic momukunda Onangama moshitukulwa shaHangwena oya fiwa pomutenya eshi vati ye liteyelwa kookalyamupombo ndele tava vake mo eholo lokunwina omaviinyu noshoyo omalapi okuyala koitaafula.

Vati ovafekelwa ova tumba mo okakefa oko kwa li ke li mongeleka kohalutali omo hamu tuvukilwa omaholo nomalapi onghee okwa li ve shi ngeenge mokakefa omu na oimaliwa.

Oshiningwanima osha ningwa Osoondaxa efimbo lokonguloshi momukunda Onangama moshikandjohoololo Ongenga.

Eshi a kwatafana naKundana omukulunhuongalo wongeleka Tresia Mwafelulo okwa hokolola ta ti oshiningwanima eshi ove shi dimbuluka efimbo longula eshi kwa li ovakwaneongalo vamwe ve uya okuwapaleka kongeleka.

Okwa hokolola ta ti ovafekelwa ova pitila momakende ongeleka nokonima ova teya omuvelo meni opo va dule okupita po eshi va dja mo.

“Otwa ninga onghendabala yokulandula eemhadi davo ashike inatu mona kutya onda xulila peni,” ta hokolola.

Mwafelulo okwa ti eholo olo la vakwa po oha li longifwa keshe Osoondaxa okuyandja omaviinyu kovakwaneongalo onghee paife itava ka yandja vali omaviinyu mOsoondaxa tashi ya shaashi kape na sha eholo. Okwa ti opolifi oya kwata po omulumenhu umwe ou ta fekelwa kutya ovo va teya ongeleka eshi kwa li a twalwa koshitaashi shopolifi pOngenga opo a ka ningilwe omapulapulo.

Okwa indila moshiwana kwaau e na ouyelele kombinga yovafekelwa ava opo shi kale sha lopotela opolifi keshe i li popepi. fhamalwa@nepc.com.na