New Era Newspaper

New Era Epaper
Icon Collap
...
Home / Ongeleka yoUniversal ya tota ongudu yokuyandja omwakwafo kovanyasha

Ongeleka yoUniversal ya tota ongudu yokuyandja omwakwafo kovanyasha

2021-07-21  Festus Hamalwa

Ongeleka yoUniversal ya tota ongudu yokuyandja omwakwafo kovanyasha

Ongeleka yoUniversal moNamibia oya tota po ongudu yaYouth Power Group ya nuninwa okukala tai yandje omakwafo kovanyasha moshilongo.

Ongudu ei oya totwa neudo ketameko lomudu ou, nohai yandje oinyangadalwa ihapu tai longo notai tungu ovanyasha i li kombinga yomahepekafano oukashikekookanhu, nghee omunyasha e na okukala e lihumbata, nghee omunyasha e na okulongela Kalunga pefimbo lounyasha nosho tuu oinima ikwao tai tungu.

Meenghundafana a ninga naKundana omukulunhu wongudu yoYPG koonoli Tutaleni Shilongo okwa hokolola ta ti elalakano longudu ei okukala tai yambidida ovanyasha aveshe moshilongo ava ve na omhumbwe yoshimaliwa shofikola, okukwafela ovanyasha moilongwa yavo, okuyandja exungomwenyo kovanyasha nokulonga ovanyasha otundimbiibeli.

Okwa ti ongudu ei oi li moshilongo ashishe koitai yavo yongeleka yoUnviseral, onghee omunyasha keshe okwa tambulwa ko opo a kale e va waimina nokutopolelafana omayele nghene ku na okukwafelwa ovanyasha.

“Mopaife ngaha otwa kwafela ovanyasha vahapu kwa li ve na oupyakadi wopamadiladilo, naava kwa li vali tava nyengwa koilongwa yavo. Ohatu lalakanene okulundulula okukalamwenyo kovanyasha opo tu kwashipaleke kutya ovanyasha itava longo vali oilonga yoikulumuna,” Shilongo ta ti. Okwa ti okwa didilikwa ovanyasha vamwe vena oupyakadi wopamadiladilo, onghee ongudu yoYPG oina oshisho opo ikale yakwashipaleka kutya keshe omunyasha e na oudu wopamadiladilo okwa pewa exungomwenyo lo wina. “Otuna yo vali oinyangadalwa yomaudano omo hatu kala atu yandje omito kovanyasha opo va kale tava dana omaudano ayooloka. Pefimbo loudano ou ota kala kuna oipopiwa yomaludi ahapu eli kombinga yomalihumbato ovanyasha. Onghee elalakano oku kwafela ovanyasha aveshe tashi pitili nomoudano,” Shilongo ta ti. Okwa hokolola ta ti pefimbo eli loCovid-19 eshi kwangambekwa ovangudumano, ovanyasha otava kala tava kufa ombinga kepandja lavo lokomalungula loYPG Namibia. “Otuna epandja loko malungula ledina YPG Namibia onghee hano ngeenge omunyasha okwa hala oku kwatafana na fye ile a hala oku tala oinyangadalwa ei a tu ningi ota dulu okukala ta endele pamwe na fye keshe efiku potundi yo19h00. Omunyasha keshe okwa tambulwa ko opo a kale ta yandje omalido aye kombinga yoshipalanyole she fiku olo,” Shilongo ta ti. Okwa yelifa ta ti oha dulu okukala tava dengele ovanyala keengodi davo dopaumwene ngeenge omunyasha eli kokule ile ngeenge e na oupyakadi woshiholekwa. Okwa ti onomola yongodi yoYPG 0813523709 ngeenge ovanyasha va hala oku kwatafana navo.


2021-07-21  Festus Hamalwa

Share on social media