New Era Newspaper

New Era Epaper
Icon Collap
...
Home / Ongeshefa natango otayi shongola mOshakati

Ongeshefa natango otayi shongola mOshakati

2022-07-28  Victoria Kaapanda

Ongeshefa natango otayi shongola mOshakati

Omunangeshefa mondoolopa yaShakati ota ti ongeshefa itayi ende nawa nando, ngaashi omimvo dha piti.

Simao Shitende okwa yambukile koshitopolwa shaZambezi, nokwe ya okukongo uuhupilo monooli yoshilongo, nokulanditha omihi, iishini, omatiti, oondhimbo niikwawo oyindji mbyoka ha hongo noku eta po noonyala.

“Nkene wala omukithi ngoka goCovid-19 gwa li gwa ponokele oshilongo, onkalo oya nyengana okushuna hoka ya li,” ta nyenyeta ngaaka.

Shitende ta ti onkalamwenyo oya dhigupala ngashiingeyi, iilandithomwa ye okwa li hayi kwata ashike oshiwike, yo oya pwa po ye ta ka honga yimwe koZambezi oshowo okutalela po nokufaalela aakwanezimo ye omboloto.

“Oomwedhi ndatu ohadhi vulu okupita inandi shuna koshilongo, oshoka ongeshefa itayi ende nando, kandi na iimaliwa yokuya kegumbo oshowo okufaalela aakwanezimo yandje sha.” Shitende ta ti ngaaka.

Ta gwedha po ta ti omimvo ntano dha ka pita, okwa li  ha mono oshimaliwa sha thika poN$15 000 moshiwike shimwe okulanditha iilandithomwa ye mbyoka ha eta po noonyala dhe.

Shitende okwa li a gandja omanyenyeto ge kutya Aanamibia kaye na ohole pokati kawo nando, ngashi ya tala e na ongeshefa yi li kohi  yomuti itaya hala okuya po ya sapote, ihe, oya hala ashike oku ka landa moositola dhaatiligane nenge dhaakwiilongo yo taya taagulukitha iimaliwa moshilongo.

 “Pehala e ye pungame ee ta ti, ningila ndje okakopi, otayi koGame nenge koPep. Nena otatu iyambula po ngiini, sho taku nyenyetwa kamu na iimaliwa moshilongo otse tatu yi gandja po kiilongo yokondje.”

Aaluudhe naya ilonge okuholathana opo ashike taya humu komeho, naya kale taya sapotathana, nokusimaneka omuthigululwakalo gwawo.

Ta ti shoka sha etwa po niikaha ohashi kala sha kola shi vulithe mbyoka ya etwa po komashina ashike aakwashigwana kaye shi uvite ko nande.

Omunangeshefa okwa li a gandja oshiholelwa shaamboka haya landa iikutu yoohango nenge yiituthi ya yooloka kiilongo yokondje, omanga, moshilongo mu na aahondji mboka taya vulu oku eta po ashihe shoka taya landa kiilongo yokondje.

Efano ndyoka otali ulike nale kutya aaluudhe inaya isimaneka nando, aahondji otaya lili kaaye na ookasitoma ihe iimaliwa otayi zi moshilongo tayi ka landa kondje yoshilongo.

Ta ti nasho osha pumbwa okutulithwa po onkene epangelo nali tale po nawa mpoka.

– vkaapanda@nepc.com.na


2022-07-28  Victoria Kaapanda

Share on social media