Otaku hokololwa kutya omuti gwomugongo ogwa simana gu vule omiti odhindji paShiwambo omolwa iiyimati yago.

Oongongo ndhoka hadhi zi komugongo ohadhi longithwa iilonga oyindji, ashike mbi ya simana okugandja omagongo nonzowe. Omuti nguka ohagu kala wo uupuka hawu liwa kaantu nokutekula oondjuhwa niikwamawawa yilwe, niipatu yoongongo ohayi longithwa onga iikuni. 

Oongongo ngele dha ningi oonshunga, ohadhi tameke  okuumba, ano tadhi zi komuti. 

Shoka ohashi holoka okuza momwedhi gwaFebuluali sigo oMai.

Omagongo ohaga kolwa kaakadhona oshowo koomeme, taya hiyathana okuza puushiinda, yo taya gongele oongongo ndhoka dha adha okukolwa.

Oongongo ihadhi vundakanithwa noongongo dhomuti gumwe gwii ili, kehe oshitoo shomagongo oshi na oshikunwa hashi zi komugongo gwasho.

Fransina Samuel gwomomukunda Okahauyulu moshikandjohogololo shEngela okwa li a hokololele Kundana esimano lyomagongo.

“Omagongo ohaga menekelwa ongula taga kolwa. Ohatu kutha oongongo ndhoka tu wete kutya odha adha okukolwa, tse tatu tsu neyinga lyongombe okutsipula ongongo nokuthina mo omeya ngoka taga zi mo, ee tatu tula moshiyuma shontumba,” ta  hokolola.

Ta ti, omagongo ohaga siikilwa miiyuma noshilapi kombanda, go taga tulwa mehala lya talala nawa. 

Samuel ta popi ta ti, omagongo ohaga kala mo omasiku gatatu nenge gane opo ga pye ga wape okunuwa.

Samuel okwa ti, okukola omagongo ohaku gongaleke aantu, naamboka kakwa li haya popi, ohaya popithwa komagongo pamikalo dha yooloka.

“Pethimbo ndyoka oomeme taya kolo, ohaya kala ye na omahokololo. Olyo ethimbo oohapu dhimwe kakwa li wu dhi shi to dhi uvu. Nongele ino kotoka oohapu  otadhi ka ninga po dhoye,” ta popi ngaaka.

Lovisa Naishidi ngoka kwa li ta kolo omagongo esiku ndyoka okwa ti, omagongo ohaga kala ge na oopelesenda dhomalovu 4 nenge 4.5.

“Pamuthigululwakalo, omagongo tango manga inaaga tamekwa okunuwa, ohaga falwa komukwaniilwa nenge kelenga enene. Omagongo ohaga vulu okupungulwa sigo omumvo tagu landula,” Naishindi ta ti ngaaka.

Ta gwedha po ta ti,  ohaku tiwa, ethimbo lyomagongo aantu ihaya pangulwa uuna ya yona oshoka kaye shi shoka taya ningi.

Aano oohapu dhopethimbo lyomagongo ihadhi landulwa.

Pefimbo Joel okwa gwedha po ta ti, natango oongongo ohadhi ningi oshikunwa hashi ithanwa oshinwa, shoka hashi nuwa kaanona oshoka kashi na iikolitha yasha.

“Oongongo ohadhi tu pe natango omahuku ngoka haga ningi omagadhi goongongo. Ngame otandi kolo kuyele oshoka inandi hala ongongo dhi ninge omapu,” Joel osho a gwedha po ngaaka.