Omayindilo gwoshitaasi shopolisi okuza kaakwashigwana yomOshigambo oga yamukulwa, nonando inashi tulwa lela mOshigambo.
Kakukutu komatanga gopolisi Sebastian Ndeitunga okwa popi kutya, molweshonopalo lyoshimaliwa, uuministeli owa kambadhala okutula oshitaasi shopolisi mOniipa.
“Ope na omananathano pokati kiitasi yopolisi, ihe oshimaliwa inashi gwana okutunga itaasi yopolisi kehe momudhingoloko. Out na ontseyo kutya Oshigambo oshi li nasho mompumbwe yoshitaasi shomayakulo gopolisi, ihe natango otwa kala nompumbwe yokukala twa tula shimwe mOniipa,” ta popi ngaaka.
Ndeitunga okwa li a gandja etompelo kutya oshitaasi shoka okwa li ya tokola oku shi tula mOniipa oshoka omo mu na omwaalu gwaantu oyendji oshowo natango ohamu lopotwa iimbuluma oyindji.
Ta ti, aakalimo yomOshigambo nOniipa ohaya kongo omakwatho kopolisi yokOnayena.
Onayena oya tula Oshigambo nOniipa pokati.
“Oshimaliwa shokugwanitha po omatengenekothaneko nomayindilo osha tetwa, onkene oompumbwe adhihe itadhi vulu okugwanithwa po,” ta fatulula ngaaka.
Momushangwanyenyeto gwa li gwa pitithwa kaakwashigwana yomOshigambo ogwa ti oya kala ethimbo nokuninga omayindilo gwoshitaasi shopolisi okuza 2011, ihe ihaya yamukulwa, nonando oya li ya ningi onkambadhala yokutsakaneka epangelo ondjilakati.
Oshigwana osha li sha kambadhala okugandja ehala mpoka tapu vulu okutungwa osasiona yopolisi, nosha li shi na ohokwe yokwiiyamba okutunga ehala lyi na olusheno nomeya, uuna taya kwashilipalekwa kutya otaya pewa aaniilonga” aapolisi”.
Natango oya li ya shanga kutya pehala mpoka ya li taya tengeneke okugandja, okwa li popepi nokapengelo okashona kepangelo.
Sigo oompaka, Ndeitunga okwa ti, ina tsakaneka omishwangwa dha popi shoka sha zi nokutumbulwa, opo a vule a ninge etokolo, sha ikolela kwaashoka oshigwana sha li sha tengeneke okuninga.
“Itandi vulu okukwashilipaleka ngele oshigwana osha shanga omushangwa gwa totha mo kutya otashi vulu okutsakaneka epangelo ondjilakati. Natango otwa pumbwa okukwashilipaleka nokuninga omapekaapeko ngele ehala ndyoka olyi li pehala ewanawa nokutula oshiitasi shopolisi,” ta popi ngaaka.
Ta ti , omolwashike oshimaliwa shoka kaashi po nawa, ihe ngele oshimaliwa oshe ya po, ayihe mbyoka ota ye yi tula miilonga.
Ndeitunga ta ti, ngele osha pitikwa, otandi tumu aaniilonga mboka taye ya okulonga.