Ngoloneya gwoshitopolwa shaMusati Erginus Endjala okwa ti nonando onkalo koshishindalongo otayi ende yu uka kondungu yongwiya, nayo oye li muupyakadhi wAangola taya ende taya indjipala kehe esiku.

“Sho nda li nde ya talele po Olyomakaya, natango onda adha ongundu yimwe opo ya thiki, ndjoka tayi imbi okangalo kafa kayakwao, kutya kape na shimwe she ya eta moNamibia, ihe otaya kongo uuhupilo,” Ngoloneya ta popi ngaaka.

Ta ti, otaya hokolola kutya ondjala oya pimbila moshilongo shawo.

Taya hokolola kutya oshako yimwe yuusila oha ye yi landa kongombe yimwe, ihe paife iimuna yawo oya pwa po.

Ngoloneya ta hokolola ta ti, oya li ye mu tseyithile kutya ohaya hawala ekopi lyo‘Don’t Worry’ limwe lyolwishi konima yoomwedhi ndatu, kehe megumbo.

“Oshili shika otashi etitha ohenda, megumbo limwe otashi vulika mu na aantu ye vule puyaheyali, onkene ekopi limwe itali gwana,” Endjala ta popi newi lyohenda. Endjala ta ti, oshili oye ya okukonga uuhupilo, ihe nayo kaye na nkene taye ya hupitha. “Ondi wete kutya mboka ya kala po oyo haya ithana yakwawo, omolwomakwatho ngoka haya mono okuza kaasihenda, ihe inaya ndhilindhilika kutya kape na oshimalwa shi li po hashi ya yambidhidha,” ta hokola ngaaka.

Ta popi kutya ngeno okwa li kape na mboka haya ende omitima, okuyayambindhindha, ngeno nayo otaya si ondjala yahugunina.

Ta popi ta ti, nkene epangelo lyawo  lya tile otali shuna, ihe otali ka galuka lyiileko oshigwana shawo, sigo o pethimbo ndika kape na shoka sha ningwa  po.

“Otwa taalela ethimbo lyomvula, onkene Aangola ayehe mboka itatu ke ya pitika ya kale mokamba moka, oshoka onkalo otayi ka kala ya dhigupala,” ta fatulula ngaaka. 

Endjala okwa li wo natango a popi kutya, okanona mpoka ka valelwa opo paandjawo. Ta ti, oohanona dhimwe dha valelwa moNamibia odha pewa nale uuthemba woshilongo, omanga dhimwe dhi li metifa okupewa.

Ta fatulula ta ti, shoka osha li sha ningwa sha ikolelela koompango dhIigwana ya hangana. Ngoloneya okwa ti, onkalo ka yi li nando hwepo, ihe otayi etitha ohenda nokushololitha.

Natango otatu tsikile oku indile mboka taya vulu noye na ohokwe yokukwathele aamwameme mbaka, ye shininge ethimbo alihe okuza nena,” ta indile ngaaka.

Okwa pandula natango ayehe mboka ya nokuyambidhidha oshigwana shika.

Caption : Onkalo yAaangola pEtunda inayi tya po hwepo.

– vkaapanda@nepc.com.na