Uministeli wiikwameni netonatelo lyokoongamba otawu kumagidha oshigwana shi shonopeke omangundumano poombelewa dhawo, omolwa omukithi gwoCovid-19 ngoka gwa indji pala moshilongo.
Onambelewa omukuluntu gwuuministeli wiikwagumbo Etienne Maritz okwa ti, oya dhidhilike kutya aantu oyendji ohaya gundumana poombelewa dhawo okuninga omaindilo gooonzapo dhomaso, po shikando. “Ethimbo ndika oma so oga ninga ogendji moshilongo, noombelewa dhetu otadhi yakula aantu oyendji, taya ningi omaindilo gaapambele yawo, onkene ota tu indile ashike omuntu gumwe a gwanithe po iilonga mbyoka,” ta ti ngaaka.
Ta gwedha po ta ti, ethimbo limwe aantu ya thika ku ya heyali, ohaya gongala oku ninga eindilo lyomupambelo gumwe, shoka kashi li mondjila no itaye keshi pitika, okukeelela omukithi gwoCovid-19 gu taandele.
“Otandi yelitha kutya omaso ohatu ga lopotelwa okuza kiipangelo ayihe, no yo pawumwene oshowo okuza koopolisi, okupitula kookompiyuta dhopashinanena,” a yelitha ngaaka.
Ta ti, uuna pena eso, ombelewa yawo ohayi ya lopotelwa eso ndjoka kokompiuta, naakwanezimo ohaya tseyithilwa nomawukwatya agehe ga nakusa.
Etumwalaka ndyoka ohali kala lina uuyelele awuhe wa pumbiwa naashoka otashi shonopaleke omikweyo oshowo engundumano lyaantu.
“Ethimbo ndyoka tapu ka ningwa eindilo lyeso, otaku ka pumbiwa ashike omupambele gumwe ngoka ta kala e na ombapila okuza koshipangelo nenge kopolisi, ndyoka tayi ulike uukwatya wafaathana naamboka wa tumwa kokompiyuta,” ta yelitha.
Ta ti, omupambele natango okwa pumbwa a kale e na okamutse koshilongo kanakusa noke mwene oshowo okopi nonado inayi dhengwa oshihako ko polisi.
“Uuna okatse ka nakusa ka ke po, omupambele naka ninge eiyindilo kopolisi okukwalishilipaleka kutya okatse ka ke po oshowo oku gandja omatompelo kutya okatse oshike ka ke po,” ta ti ngaaka.
Ta gwedha po ta ti, omukwanezimo ngoka na kale e na ontseyo mpoka tapu ka fumbikwa omupambele gwawo, ethimbo ta ningi eyindilo lyonzapo ye so.
“Ota tu kumagidha oshigwana shi kale ko magumbo nenge moohauto omanga gumwe ngoka a inekelwa okugwanitha po omalongekidho ngoka ta yi moombelewa.