Ookansela otaya ithana omambakumbaku gopaumwene ga ishangithe koombelewa dhawo opo ga vule okuyambidhidha aanafaalama oshoka omambakumbaku gepangelo inaga gwana.
Uuministeli wuunamapya owa gandja omambakumbaku 145 miitopolwa ya yooloka moka ga andjanekelwa miikandjohogololo.
Omugandji gomauyelele muuministeli wuunamapya Jona Musheko okwa ti, kehe oshikandjohogololo osha pewa embakumbaku limwe nenge gaali okuyambindhindha aanafaalama yomomapya.
“Kehe ngoka ta ka mona ompito yokulongitha embakumbaku lyepangelo ota ka pulwa ashike N$250,” ta fatulula ngaaka. Ta gwedha po kutya epangelo olye ya po nopologalama yokuyambidhidha natango aanafaalama oku ya tsakaneka ondjilakati uuna inaaya mona embakumbaku lyepangelo.
Ooyene yomambakumbaku oya kumagidhwa yi ishangithe koombelewa dhookansela opo ya futwe etata kepangelo uuna taya pululile aanafaalama lyo etata lya hupako tali futwa ko kaanafaalama.
Ookansela ya yooloka monooli oya kwashilipaleke kutya omambakumnbaku gepangelo haya pewa miikandjo hogololo omashona, ihaga kwathele aanamukunda ayehe. Kansela gwoshikandjohogololo shOgongo Daniel Iilende okwa ti, ooyene yomambakumbaku gopaumwene okwa li ya hulitha po okwiishangitha mopologalama ndjoka oshoka epangelo okwa li hali kwata ethimbo okufuta ko etata ndyoka.
“Uupyakadhi mboka owa kandulwa po, payife iimaliwa mbyoka ohayi kwata ashike omasiku omashona,” ta popi ngaaka. Ta indile ta ti, otaya pandula unene ngele oyene yomambakumbaku ye ya okwiishangitha opo ya vule okuyambindhindha aanafalama.
Aram Martin kansela gwoshikandjohogololo Oshakati shokuuzilo okwati, uupyakandhi wiimaliwa ya kala ko owa patukununwa.
“Paife iimaliwa mbyoka oyili miitopolwa, onkene itayi kala ko we. Iilkandjohogololo oyindji oya pumbwa omayambindhindho gomambakumbaku ga gopaumwene,” ta popi ngaaka.
Ta ti, ota pandula aakalimo yomoshikandjohogololo she sho yu uvu ko ekemo ndyoka, oyendji ngele haayehe oyi ishangitha. kansela gwoshikandjohololo shUuvudhiya Timoteus Shivute okwa ti, onkalo yokumona ompito yokupululitha nembakumbaku lyepangelo moshikandjohogololo she oya kala ondhigu, oshoka aantu oyendji ihe omambakumbaku oga kala ashike ge li gaali.
“Nonando shoka sha kala ngaaka, ota tengeneke onkalo tayi kala hwepo omolwa omukalo ngoka gwa tulwa po gomambakumbaku gopaumwene ta gaka ka kwathela aanafalama,” ta popi ngaaka.
Ta ti, oyendji oya ishangitha, okupululila oshigwana, yo taya futwa etata kuuministeli omanga etata tali futwa kaanafalama