Victoria kaapanda

Aakalimo yomOshakati oya nyenyeta kutya oombalunsa itadhi gandja omayakulo giihwa po, ihe inaya yelithilwa kutya omolwa shike. Selma Natangwe gwomomukunda Okatana okwati, Osoondaha oya lopota omunuumvu ngoka yali yaadha alala mevi, itaa inyenge ye itaa popi, ihe sho yali ya kongo omayakulo okuza koshipangelo nook polisi, oya hulile muunyengwi.

“Okwali nda dhengele tango opolisi konomola yomeendelelo, no ndali nda yamukulwa kutya nandi dhengele koshipangelo, hoka kwali nda pewa onomola yo ambulansa,” ta hokolola. Ta ti, mboka yali ya yamukula kombinga yo ambulansa oya ti, yo itaya vulu okuthika oshoka aapangi oya tinda ko.

Taya ti, anuwa oya yamukulwa kutya aapangi ohaya thiki ashike uuna pena omuntu ta mono okanona nenge pwa holoka oshiponga sho hauto. “Eyamukulo ndyoka okwali lyuuvithandje nayi. Oambulansa nani oyina omayakulo gamwe ashike ngoka hayi gandja? Okwali ndishi kehe omunumvu keena ohauto ota vulu okukwathelwa koambulansa,” ta popi ngaaka.

Ta ti, aashingi yo ambulansa okwali ye mu pula ngele ka pena ohauto opo a fale omuntu ngoka koshipangelo. “Se okwali twa tila okunyenga omunuumvu oshoka katu shi kutya oteehama shike, sho shoka kwali twa kambadhala oku konga omakwatho koshipangelo noko polisi,” ta popi ngaaka.

“Okwali natango oshidhigu okumunyenga oshoka se katumushi, oshowo ka tushi nando aakwanezimo ye,” ta ti ngaaka. Natangwe ta ti, omunumvu ngoka okwali ye mu mono po22h00 yuusiku, ashike okweya oku mona ekwatho ongula po hetatu.

Tati, alala ashike pondje mevi,  no kweya oku mona ekwatho sho ya kala taya kondjitha opolisi. “oshipangelo nashi lundulule, omuntu nando ka kwali ena oku sa, ota si ashike oshoka ina mona ekwatho mbala, osha puka nayi,” ta popi ye ta tangunga.

Ta ti, uupyakadhi mboka natango oye tsakaneka ko polisi, una tayi dhengelwa kutya opena aantu taya tanguna, ihayi thiki ihe ngele oyuuvu aantu yiidhipaga otaya endelele. “Naye tu yelithile kutya ohaya gandja omakwatho geni, opo tu kale itatu ipyakidhile noku dhenga oongodhi oshowo oku mana po ethimbo,” ta ti ngaaka.

Omukuluntu gwoshipangelo sho kwali adhengelwa kuKundana opo atye kosha, ka kwali taya mukula ongodhi ye. Omupopiliko gwopolisi moshitopolwa shaShana Thomas Aiyambo okwati, uupyakadhi mboka wo ambulansa, itaayi gandja omakwatho okweu lopotelwa.

“Shika ka shili mondjila, no tandi kutha onkatu opo ndikuutumbe naambelelwa aanene moshipangelo opo tukundathane uupyakadhi mboka oshowo tu pwiikine nkene wuna okukandulwa po,” ta ti ngaaka.

Ta ti okwali akambadhala oku pula omawuyelele kaapangi, ihe oya ti opena ngaa omaupyakadhi ge li po, ngoka gena okukandulwa po.