New Era Newspaper

New Era Epaper
Icon Collap
...
Home / Oomeme mOshana ya kugu komahepeko

Oomeme mOshana ya kugu komahepeko

2023-03-10  Victoria Kaapanda

Oomeme mOshana ya kugu komahepeko

Esiku lyoomeme lyopaigwana ndjoka hali dhanwa aluhe meti 8 Maalitsa muuyuni, mOshakati olya dhanenwa kOthingo, omukunda guli muuninginino wOshakati.

Esiku ndyoka okwali lya gongele aakiintu okuza momindhingonoko ndhopopepi, nokwali ya gandja omanyenyeto gawo omolwa omahepeko ya taalela, taya ti, inaya manguluka we.  

Oomeme okwali ya yelula omapalakata gawo moka ya shanga taya indile uuthemba waankiintu nuunona wu simanekwe nomahepeko ga hulithe po.

Ndhoka okwali ye dhi popi komeho gaNgoloneya gwoshitopolwa shaShana Elia Irimari oshowo opolisi yaNamibia.

Irimari esiku ndyoka okwa li a tsu kumwe naashoka oomeme taya nyenyeta, oshoka oshilongo otashi lili.

“Omolwa onkambandhala yopolisi noshigwana, oshitopolwa shaShana osha lopota ipotha yomahepeko iishona, okuyelekanitha niitopolwa yilwe yokonooli,” ta ti ngaaka.

Ngoloneya okwali a kumagidha oshigwana shi hulithepo omahepekathano.

Ta ti, kapena uupyakandhi ihau kandulwapo.

Omunambelewa omukuluntu koshikondo shuukashikekookantu mopolisi yaNamibia Monika Erasmus, okwa ti oshigwana osha taalela uupyakandhi oshowo omahepeko ga yooloka ihe itashi lopota iiningwanima mbyoka.

‘’Omahepeko oha geya momikalo dha yooloka, gamwe ogo kugumwa kolutu gamwe ogo pa kana,” ta ti ngaaka.

Erasmus okwa ti, omakwatho ota geya uuna ga kongwa, onkene oshigwana nashi kale tashi lopota aluhe iiningwanima mbyoka. 

Klaudia Andreas ota ti, kutya esiku lyawo olya li unene tali popi kombinga yomakwatokookondo goomeme nuunona nomahepeko gawo. ‘’Ina tu manguluka we momagumbo. Iningwanima paife otayi ningwa kaantu ayehe, oomeme notate oshowo kaanona. Oshike shina okuningwa po ano? Ta pula ngaaka.

Momukanda gwawo gwomanyenyeto, oomeme mbaka otaya ti, kutya nonando pwa ningwa ooveta ngashi ndjoka yi na sha nomakwatokoonkondo naandjoka yomahepekathano gomomagumbo, omakwatonkoonkondo goomeme nuunona onkee ngaa taga tsikile, go omahepeko goomeme nuunona nago onkee ngaa taga tsikile, ngashi taku uhala taku kundanwa miikundaneki nosho tuu.

Oshiwike sha ziko okwa lopotwa okanona kokakandhona komimvo 16, ka mangelwa momuti nomalyenge ku hekulu.

Oshiningwanima shoka okwali sha holoka momukunda Onekaku moshitopolwa shaShikoto.

Okwa hokololwa kutya oyendji megumbo moka hamu zi okanona hoka kali kamangelwa momuti, oya kala ya taalela omahepeko ga yooloka, ihe oya mbandamekwa kutya ngele oya lopota iiningwanima mbyoka, omufekelwa  oteya eya landule.

Omukoanakoni gwiimbuluma yi na sha nomahepeko guukashikekookantu gopolisi moshitopolwa shaShana Monika Nakanyala, moonkundathana naKundana okwa li a popi yimwe yomwaambyoka a li a koneke hayi eta omahepeko.

 “Otwa koneke kutya oluhepo nalo otalu dhana onkandangala momahepeko. Unene ngele megumbo kamu na iiyemo ya gwana, ohashi eta omalungwenye, okunyenyeta sigo tashi eta omadhengathano, ngoka haga holoka momikalo dha yooloka mwa kwatelwa okudhipagathana oshowo okumonithathana iiponga,” ta fatulula ngaaka.

Nakanyala natango okwa totha mo elongithonayi lyiikolitha. 

Ta ti, omahepeko okupitila miikolitha ohaga vulu okuholoka natango pamikalo dha yooloka.

“Ope na aantu mboka haya longo omiyonena konima ya nu iikolotha oshowo iingangamithi oshoka shoka ta ningi, ita yoolola ngele oshi li mondjila nenge osha puka oshoka omadhilaadhilo okwe ga piyaganeka niikolitha nenge niingangamithi,” ta popi ngaaka.

Ta gwedha po ta ti, ope na natango mboka ya itaala anuwa moku  thigulula omikalo dhaakuluntu yawo. 

Ngaashi okudhenga omukiintu gwe oshoka anuwa nayina okwa li ha dhengwa kuhe.

“Oyendji oya taalela omahepeko ga yooloka momagumbo, ihe oya mbandamekwa, kaaya pitithe mo omawulele ngoka. Opolisi ohayi longele kumwe naahungimwenyo, mboka oyo ye na ontseyo nkene nakuninga oshihakanwa e na oku eta uuyelele awuhe,” ta fatulula ngaaka.

vkaapanda@nepc.com.na

 

 


2023-03-10  Victoria Kaapanda

Share on social media