Victoria Kaapanda
Ehangano lyoTelecom olya ti otali shunithwa monima kaafuthi taya yaka oondjandjo dhomalungula ga longwa mongopolo, ngoka haga longithwa momakwatathano.
Omupehakuluntu gwomauyelele mehangano lyoTelecom Tracey Schaller, okwa ti, okuza omumvo gwa yi unene pethimbo lyomatango omanene, ehangano lyawo olya lopota iipotha oyindji yaafuthi taya yugu oongodhi dhiikwatenda.
Momushangwa ngoka kwa li a pititha okwa ti, shoka okwa li sha eta uupyakandhi uunene kookasitoma dhawo, sho oongodhi tadhi tetagulwa kaafuthi.
“Ehangano lyetu olyi li ompinge noshinima shoka, onkene mboka taya longo iilonga ya tya ngaaka, naye shi hulithe po. Otashi ke ya tula muupyakadhi uuna ya kwatwa,” ta ti ngaaka.
Ta gwedha po ta ti, ehangano lyoTelecom otali indile omahangano ngoka haga landa iikwatenda kaaye yi lande we kaayi na uuyelele wa gwana kutya oya zi peni.
Ta kumagidha natango iihauto nehangano lyoCargo ndyoka hali tumwa niifaalelwa kaali londeke we iitenda ya yakwa.
Omukuluntu gwehangano ndyoka Stanley Shanapinda momushangwa ngoka okwati, okwandhindhilike kutya aafuthi itaya yaka ashike oongodhi, ihe otaya yaka wo natango omamanya oshowo oosola, nohaya ka teyagula wo natango omakumba okuya momahala moka.
“Ehangano lyetu otali shunithwa monima kaafuthi. Shoka taya longo kasha li mondjila notashi pula ehangono oomilliona odhindji okulandulula nokupangela mpoka pwa yonagulwa,” ta popi ngaaka.
Ta ti, shoka natango osha kala tashi tula ookasitoma dhawo muupykadhi, omolwiilonga yawo tayi shunithwa monima.
“Out na oongodhi dha andjanekwa ookilometa omathele, dhimwe odhi li koopaala omanga dhimwe dhi li kohi yevi, onkalo ndjoka itayi tu pitike tu tule po aakeleli yoongodhi ndhoka,“ ta popi ngaaka.
Shipanda ta ti, otaya gandja ombili kookasitoma dhawo, nuupyakandhi mboka ohau etwa kaafuthi.
“Otatu indile moshigwana opo shi kale tashi longele kumwe nehangano lyetu, opo shi kale tashi lopota kehe ngoka ta longa iilonga yoludhi ndoka,”ta indile moshigwana.
Ta ti, oshigwana inashi kala shi na uumbanda okutseyithila oombelelewa dhoTelecom uuna sha tsakaneke iiningwanima yolughi ndoka.
Uupyakadhi mboka owa taalela natango omahangano gokwaandjaneka omalusheno oshowo oomita dhomeya, omolwa oondjundo dhawo.
Otaku hokololwa kutya ehangano lyiikwatenda ndyoka hali landa iitenda mbyoka, ohali futu oshimaliwa shi li hwepo ngele oshitenda shina ondjundo oyindji. – vkaapanda@nepc.com.na