Ongeleka yopambepo Prophetic Embassy Ministry mOshifo moRuacana oya kumagidha oongeleka adhihe moshilongo dhi kale hadhi yambidhidha oshigwana uuna shi na omawupyakadhi, okugandja omakwatho oshowo okukwathela mboka ye li moluhepo.
Izata Nganga, pastoli gwomongeleka moka okwa ti, aantu oyendji ha yayi kongeleka, omolwa omawupyakadhi ga yooloka.
“Ongeleka oya tali kako onga ehala lyokukandulapo uupyakadhi awihe, onkene yamwe oha ya yi, okugalikanenwa ookwaludhwa komauwehame, ondjala, oluhepo nosho tuu,” Nganga ta ti ngaaka.

Ta gwedha po ta ti, aantu mboka omawupyakadhi gawo otaga kandulwapo uuna taya yambidhidhwa, onkene otakumagidha oongelaka dhi kale tadhi gandja wo moshigwana.
Pethimbo Kundana a li a talele po ongeleka ndjika, okwaadha aantu yethike 30, yadhika ootenda dhawo pondje yongeleka, ya kalelela omagalikano.

Nganga okwafatuluula kutya aantu mboka, oye ya okugalikanenwa yena omawupyakadhi ga yooloka.
Ta ti, ohaya kalapo oshiwike shimwe, mo moshiwike tashi landula a puya natango ongundu yimwe ta yeya ya kalepo natango oshiwike shimwe.
Ongeleka ndjika oya li ya gandja oshiholelwa nkene, oshigwana shina okuyambidhidhwa. 

Nganga okwa li atopola moshigwana, iikulya noothewa moshitopolwa shaMusati momikunda dha yooloka.
“Oongeleka inadhi kala we, odho hadhi pewa ashike, ihe nadho nadhi kale tadhi gandja natango moshigwana. Mpoka ha pu zi ohapuya oshindji,” Nganga a kumagidha.

Ta ti, uunene omakwatho oheye ga gandja kaaHimba mboka ye li moondundu.
Ta ti, moondundu omuna aantu taya mono ihuna unene, noyendji oya ninga ondjila ya wo okuya kongeleka.
“Omumvo gwa yi okwa li twa yambidhidha opolisi yaRuacana, niikeelelitho yomukithi gwoCovid-19, konima kwa li twa dhidhilike iilonga yawo.