New Era Newspaper

New Era Epaper
Icon Collap
...
Home / Opolifi tai kongo omushingi wotuwa

Opolifi tai kongo omushingi wotuwa

2022-09-05  Festus Hamalwa

Opolifi tai kongo omushingi wotuwa

Opolifi moshitukulwa shaShikoto otai indile moshiwana kwau e na ouyelele kombinga yomushingi wotuwa ou vati a lyata nokudipaa omunhu ndele ta faduka po.

Oshiningwanima eshi osha ningilwe momafiku 24 Anguste mondjila yaNdangwa nOmuthiya momukunda Okatundu lwopotundi 23h45.

Nakufya oye Johannes Iilonga weedula 37 a dile komukunda Onankali.

Omupopiliko wopolifi moshitukulwa shaShikoto Inspector Ellen Nehale okwa ti Iilonga okwe li tuwa a nangala pomukunghulo wopate a fya konima eshi a lyatwa komufekelwa ndele ta faduka po.

Nehale okwa ti fiyo opapa ka pena ouyelele kutya Iilonga okwa lyatwa kulyelye onghee opolifi otai pula ovakwashiwana opo longele kumwe nopolifi mokuyandja ouyelele ou kombinga yomufekelwa ou.

Okwa yelifa ta ti opolifi ita i ka popya edina lomunhu ou taka yandja ouyelele onghee oshiwana otashi kunghililwa opo shi kale sha manguluka okuyandja ouyelele ou diva.

Nehale okwa ti elalakano opo omushingi ou a kale a kwatwa po diva shaashi okwa longa oshimbuluma eshi a lyata nokudipaa.

Onghee okwa ti omushingi ota kongwa opo a kale a pangulilwa oshibofa shokushinga nouyasha, eshi a eta oshiponga ndele ta faduka po noshoyo eshi a dopa okuyambidida nakuninga oshihakanwa.

Okwa ti kushe ou ta ka mona otuwa ya holekwa ndele tai ulike kutya oya li moshiponga na kwatafane naChief Inspector Endjala 0812559815 ile Warrant Niinkoti 0812733199.

– fhamalwa@nepc.com.na


2022-09-05  Festus Hamalwa

Share on social media