Opolisi moshitopolwa shaShana oya ndhindhilike aafuthi taya longo ya itula mo unene miitopolo ayihe yokoonoli, onkene otayi kumagidha oshigwana shi kale sha konata sho shi kale shi na oonomola dhopolisi dhomeendelelo.

Omupoliki gwopolisi moshitopolwa shaShana okwa ti Thomas Aiyambo, oombudhi odha ninga odhindji mondoolopa yaShakati, Ongwediva oshowo Ondangwa, onkene oshigwana osha pumbwa okukala sha kotoka kehe mpoka shili.

“Opolisi yaShana oya ilongekidha aluhe okuyambidhidha oshigwana uuna sha lopota omaupyakadhi ngele sha ponokelwa kookalyamupombo mboka taya yuugu oshigwana,” tayi ti ngaaka.

Opolisi oya popi ngaaka ko nima ya ningi ethimbo tayi lopotelwa iiningwanima yoludhi ndoka tayi indjipala mondoolopa, unene tuu mbyoka yoositola naantu taya yugwa iimaliwa kookalyamupombo.

“Oshiwike sha zi ko okwali twa kwata po ohauto yokaPolo okatokele oshowo aafuthi ya tano mboka kwali ya lopotwa ya ningi ethimbo taya ningile oshigwana omiyonena moondoolopa mbali dho monooli,” Aiyambo ta ti hokolola ngaaka.

Ta ti, natango moshiwike sha zi ko otwali twa mangamo omulumentu ngoka a li pamwe namakwawo gumwe amatuka po, yali ya kuthile omukukadhi gumwe ombele noku mu yuga oongodhi ongula yEtitano.

“Mohauto moka okwali twa adha mo oondjato mbali tadhi fekelwa yena mpoka ye dhi yugu aantu oshowo iilongitho yoku teya omagumbo oshowo oombele,” ta ti ngaaka.

Ta ti, konima yohauto natango okwali yaadhako oonomola dhoohauto, dhoka haya longitha okupingathaneka ngele ya longo iilonga yawo.

Aiyambo okwa ti, oya dhidhilike wo natango kutya oombudhi dhimwe otadhi zi kiitopolwa yilwe yoshilongo yeya okuningila aantu omiyonena moshitopolwa shaShana.

“Otandi kumagidha oshigwana shi longele kumwe nopolisi opo kehe gumwe a kale e na onomola yopolisi, opo shi lopote kehe shimwe tashi holoka moshitopolwa,” Aiyambo ta ti ngaaka.

Ta ti, opolisi oya ilongekidha ethimbo alihe, okugamena oshigwana. 

Onomola yomeendelelo yo polisi 081 363 0666 .