New Era Newspaper

New Era Epaper
Icon Collap
...
Home / Opolisi yaMusati ya lulilwa komaso gomeya

Opolisi yaMusati ya lulilwa komaso gomeya

2022-03-11  Victoria Kaapanda

Opolisi yaMusati ya lulilwa komaso gomeya

Omukuluntu gwopolisi moshitopolwa shaMusati Titus Shikongo okwa ti, ota tsikile okukumagidha oshowo okugandja omalongo kutya oshigwana inashi kala tashi piti omeya omanga shi li kohi yiikolitha.

Omeya oga faalele oomwenyo dhaakalimo yomOmusati oyendji, ngashiingeyi ya lopotwa ye li 16 moomwedhi mbali nomasiku ashike.

“Otatu kumagidha wo natango oshigwana kaashi dhane nomeya nenge shi iyoge momilonga dhomeya oshoka osha nika oshiponga,” ta kumagidha ngaaka.

Shikongo ta ti, oshigwana nashi kale tashi kala tashi pula okuyambidhidhwa okuthindikilwa komagumbo ngele shi li kohi yiikolitha, unene ngele taya piti pomahala pe na omeya.

“Aakuluntu naya kale taya sile aanona oshimpwiyu oshowo oku ya kumagidha, okuyanda omaso gombaadhilila,” ta popi ngaaka.

Ta gwedha po ta ti, omaso gomeya oga ninga unene ogendji moshitopolwa shawo, notaga tilitha, onkene oshigwana nashi kale sha kotokela omeya.

Shikongo okwa li a kumagidha ngaaka sho kwa li ya lopotelwa omulumentu Omuangola ngoka olutu lwe kwa li lwa adhika kombanda yomeya ongula yEtitu moshitopolwa shaMusati.

Oshiningwanima shoka osha holoka molukanda Omulamba moshikandjohogololo Anamulenge.

“Otaku hokololwa kutya omulumentu ngoka anuwa okwa li a monika lwahugunina e li kohi yomalovu,” ta popi ngaaka.  

Ta ti, kape na uuyelele wothaathaa kutya omulumentu ngoka momeya okwa yi mo ngiini.

Okwa tseyika ashike nedhina Andonie, ihe ofani nomimvo dhe inadhi tseyika.

Shikongo okwa ti, omulumentu ngoka okwa li ha longo megumbo limwe momukunda Omundjalala.

Opolisi oyi li metifa okuninga omakonakono kutya omulumentu ngoka okwa li a si omeya ngiini.

– vkaapanda@nepc.com.na


2022-03-11  Victoria Kaapanda

Share on social media