New Era Newspaper

New Era Epaper
Icon Collap
...
Home / Opoloyeka yoku kwafela ovakulupe noilema mOkongo

Opoloyeka yoku kwafela ovakulupe noilema mOkongo

2021-07-19  Festus Hamalwa

Opoloyeka yoku kwafela ovakulupe noilema mOkongo

Kansela woshikandjohoololo shaKongo Efraim Shipindo ta ti ombelewa yaye oya tota po opoloyeka ei ya nuninwa okukala tai yandje omakwafo kovakulupe, ovanhu vena oulema, eefiye novanhu voshiwana shovayelele.

Menghundafana a ninga naKundana Shipindo okwa hokolola ta ti ombelela yaye oi na oshisho noshiwana notai kwashipaleke kutya ovanhu aveshe ova mona omayakulo ngaashi naana ya pewa oshinakuwanifa kepangelo.

Shipindo okwa popya ta ti mopaife ngaha ombelewa oya tota po opoloyeke ei tai kala tai hongele oikulya, noshimaliwa opo kukale ta kukwafa ava veli momhumbwe moshikandjohoololo shaye.

“Moshikandjohoololo shange osho shimwe sha didilikwa shina shiwana shovayelele shihapu osho shili tashi mono oixuna neenghono. Onghee opoloyeka ei otai kakwashipaleke kutya ovayelele vetu vomoshikandjohoolo ka vena omhumbwe yoikulya,” Shipondo ta ti.

Okwa hokolola ta ti opoloyeka ei otai ka kala yo vali ina oshinakuwanifa sho kukala tai yandje ehongo kovakulupe noilema nghene ve na okukala tava longifa oshimaliwa shavo shopendjela shaashi okwa didilikwa ovanhu vamwe vomoshikandjohoololo shaye ava veli hava kwata opendjela iha va longifa oshimaliwa shavo nawa ngaashi sha ufwa oku longifa.

Onghee okwa yelifa ta ti opoloyeka ei otai ka kwafela ovakwashiwana vahapu neenghono shaashi oya nuninwa okweeta omalunduluko moshikandjohoololo shaKongo.

“Mopaife ngaha ombelewa yange oya tameka nopoloyeka yoku yandja oilonga yokeenyala kovanyasha, omo ovanyasha vahapu veli pyakadila nale noilonga yavo. Ondili ndina yoo oshisho novanyasha vomoshikandjohoololo shange shaashi onda hala ngeno moshikandjohoololo shange mu kale muna ovanyasha vena oilonga yavo vene, vo ota ningi eengeshefa davo tashi pitile moilonga yombelewa yange,” Shipindo ta ti.

Shipindo okwa twa oshiwana omukumo opo shi kale tashi kwatafana nombelewa yaye una ngeenge shapumbwa omayakulo.

“Natu twikileni oku liufa komilandu doCovid-19 edi da tulwa po shaashi omukifi ou owa nyika oshiponga neenghono,” Shipindo ta ti.


2021-07-19  Festus Hamalwa

Share on social media