Mayola gwondoolopa yaShakati Leonard Hango okwa ti elelo lyondoolopa yaShakati otali tsikile okulonga nuudhiginini okugandja oopolota kukehe omukalimo ta ka ninga omayindilo.
“Itatu ka thiga nando omukalimo gwetu kee na olukalwa lwe mwene. Shika osho shimwe shomiinakugwanitha yetu,” ta ti ngaaka.
Hango okwa ti oye na omahala ga gwana onkene aakalimo otaya ka mona omahala opo ya longekidhe onakuyiwa nolukalwa lwaanona yawo.
Ta ti natango oya ipyakidhila okwoopaleka nokulongekidha oopolota kOnawa, Othingo oshowo Ompumbu ya tembudhile ko aakalimo yamwe okuza momalukunda.
Ta gwedha po kutya aantu oyendji natango otaya ningi omayindilo gomahala.
“Ethano ewanawa sho aantu taya ningi omayindilo gomahala gawo yene, naashoka otashi tu pe omukumo okulongekidha etengenekothaneko ewawanawa monakuyiwa, oshoka otu wete kutya aantu oyendji oye li mompumbwe yomalukalwa,” Hango ta fatulula.
Ta ti, sigo oompaka aantu ya pita 15 000 oya ninga omayindilo gomahala, omanga ya gandja nale omahala kaantu ya pita 600 kOnawa.
Mayola okwa kwashipaleke kutya elelo lyondoolopa olyi na omahala ga gwana, okugandja kaakalimo yawo, onkene kehe ngoka a ninga eyindilo ota ka mona ehala lye mwene.
“Onawa onene, natango oku na omahala ogendji ga gwana aantu ayehe ye li mompumbwe mondoolopa yaShakati,” ta popi ngaaka.
Hango okwa kumagidha kehe gumwe e na ehalo lyokukala e na uuthemba wevi lye mwene, a ninge omayindilo paife.
“Omayindilo gomahala oga mangulukila kehe gumwe kutya iha longo, kutya oha nyangadhala ota vulu okuninga omayindilo, shampa ashike a ndhindhilika kutya oha mono iiyemo iishona nenge ke na sha iiyemo,” ta kumagidha. Ta ti, oshigwana nashi uve ko kutya, aluhe ngele to tembudhwa pehala wa adhika po ihe ku na uuthemba wuumwene wehala ndyoka, elelo lyondoolopa itali futu aantu mboka. “Elelo lyondoolopa otali tembudha ashike aantu mboka e taya pewa ehala limwe pamwe pwi ili, ndyoka tali kala ehala lye mwene, lyi li kedhina lye,” ta fatulula ngaaka.
Mayola okwa gwedha po kutya omumvo tagu ya otaya ka tameka okutula olukanda Okandjengedi oshowo Oshoopala melandulathano, ga kale ponkatu ombwaanawa.
vkaapanda@nepc.com.na