New Era Newspaper

New Era Epaper
Icon Collap
...
Home / Oshakati sha opalekwa nawa

Oshakati sha opalekwa nawa

2022-09-12  Victoria Kaapanda

Oshakati sha opalekwa nawa

Elelelo lyondoolopa yaShakati mEtitano olya li lya kutha onkatu opo li opaleke ondoolopa ayihe koonono.

Pethimbo lyoshikonga shika Mayola gondoolopa Leonard Hango, okwa li a kunkilile omuthindo kutya ekako oshinima oshiwinayi onkene uuyogoki nawu kale oshinima sho tango.

Eopaleko ndyoka hali ningwa omvo kehe, olya li lya longekidhwa kohi yoshipalonyolo “Oshakati nashi zize, sho nashi kalekwe sha yela”.

“Uuyogoki owa simana onkene oshigwana oshi na okukala tashi opaleke omalukalwa gasho oshowo omidhingoloko dhasho opo kuyandwe omikithi tadhi vulu okupitila moongaga,” ta popi ngaaka. 

Ta kumagidha oshigwana shaShakati kutya, nashi kale sha tula uuyogoki komeho.

“Ondi inekela kutya kehe gumwe okwa hala ondoloopa ndjika yi hume komeho, pamukalo gwomayakulo gayooloka, ihe shoka otashi ningwa ashike uuna ondoolopa ya yela, oshoka kape na ngoka ta hala, oku eta ehumo komeho mehala lya gagala,” ta ti ngaaka.

Hango okwa kumagidha oshigwana kutya, esiku ndyoka ina li kala olyo ta li opalekitha ondoolopa yaShakati, ihe nashi kale onkalondjigilile noshi holelwa sho ku opaleka aluhe.

Ta gwedhe po ta ti, okwa nyanyukilwa aakalimo yomOshakati sho ya kutha ombinga oku opaleka ondoolopa yawo.

“Ngaashi naana, sha tumbulwa moshipalanyolo sho nuumvo kutya, ondoolopa yaShakati nayi zize, otandi kumagidha aakwashigwana ya itule mo moku kuna omiti,” ta kumagidha ngaaka.

Hango okwa ti, uuyogoki otawu kala po ashike uuna, kehe gumwe tewu simaneke noku wu tula miilonga.

“Ondoolopa otayi kala ombwaanawa uuna ya yela,onkene otandi, tsikile okukumagidha oshigwana shaShakati shi kaleke po uuyogoki,” ta popi ngaaka.

Ta ti, kehe gumwe na kaleke ehala lye lya yela, opo shi kale oshi holelwa sha kehe gumwe.

Ehumo komeho lyondoolopa ohali holoka una pe na uuyogoki.

Omupopiliko gondoolopa yaShakati Katarina Kamari, okwa kumagidha  oshigwana shi tsike omiti.

Ta ti omiti ohadhi dhana onkandangala mo mikalo ndha yooloka, nodha simana wo monkalamwenyo yo  muntu kehe.

“Omiti ohadhi opaleke oondoolopa, ohandhi gandja ombepo  nohadhi koleke uundjolowele womuntu,” ta ti ngaaka..

Kamari okwa kumagidha natango oshigwana ta ti, nashi kale oshinakugwanithwa shakehe gumwe okutsika omiti.

- vkaapanda@nepc.com.na


2022-09-12  Victoria Kaapanda

Share on social media