Omukuluntu gwomakwatathano mombelewa yelelo lyondoolopa yaShakati Katarina Kamari okwa kumagidha aakalimo yomoshitopolwa shaShakati ya longele kumwe, yo ya taambe ko aanambelewa taya ka pombele omagumbo gawo.
Kamari okwa ti nuumvo otaya ka pombela ashike omalukanda gamwepo, sha ikolelela kiipotha yoMalaria ya lopotwa momahala moka, okutameka kehuulilo lyomumvo gwa yi sigo onuumvo.
Ta fatulula ta ti, oya totho mo ashike omalukanda gamwe oshoka itaya vulu okutsinina kehe olukanda, oshoka omuti gwokutsinina ogu na ondilo.
“Aanambelelwa mboka otaya ka enda egumbo negumbo, onkene naya tambulwe ko nesimaneko oshoka shoka taya longo oshi na sha nuuwanawa wetu, oshowo kehe megumbo namu kale hamu thigwa omuntu ngoka te ya yakula,” Kamari a kumagidha.
Elelo lyondoolopa yaShakati, melongelokumwe nuuministeli wuuhaku nonkalonawa, otali ka tameka noshikonga oshinene shoku pombela omagumbo ngoka okuza momasiku 19 gaKotomba notaku ka hula momasiku 17 gaDesemba nuumvo.
“Okupombela otaku katameka kEvululuko,olukanda lwaPohamba, Onawa, Oshoopala , Oshikango oshowo Oontokele,” Kamari ta ti ngaaka.
Kamari okwa ti, elalakano lyokupombela omagumbo, okukeelela omukithi gwoMalaria ngoka hagu zi unene moomwe.
Nonande oomwe haadhihe tadhi kaya ngele omagumbo ga pombelwa, ohadhi shonopala, okushonopaleka wo oompito dhoku kwatwa komukithi gwaMalaria. Ta ti, osha uka pethimbo lyomvula, mpoka oomwe hadhi indjipala, omolwa omeya noomwidhi.
Ta popi ta ti, Uuministeli owa kala hawu hawaleke oonete dhoomwe pethimbo ndika lyokupombela omagumbo omvo kehe, ihe nuumvo ita dhi ka gandjwa.
“Omukithi gwoMalaria ogwanika oshiponga. Ohagu faalele oomwenyo dhaantu onkene otuna okukambadhala opo tu vule okugu keelela. Aakwashigwana nayo naya longitho wo ikeeleli yena, okukeelela omukithi ngoka,” Kamari a popi ngaaka.
Omagumbo ngoka otaga ka pombelwa omasiku ga yooloka.
Evululuko oshowo Olukanda lwaPohamba 04-20 Kotomba, Kandjengedi 21Kotomba-05 Novomba, Onawa 08-17Novomba,Oshoopala 18-26 Novomba, Oshikango 29 Novomba sigo 03 Desemba omanga Oontokele 06 -17 Desemba.