Aalongwa ya tambulwa kiiputundhilo yopombanda moshitopolwa shaShana taya yambindhindhwa noshimaliwa sho kwiinyolitha.
Konima oombelewa onene dhaNgoloneya moshitopolwa shaShana dha dhidhilike uupyakandhi hau kala wataalela aalongwa omvo kehe, odheya po nomayakulo.
Omuyakuli gwaNgoloneya Kristophine Nakandungile okwa ti, oya eta po omayakulo geli ngaaka, konima yali ya dhindhilike kutya oshimaliwa sho petameko lyomumvo ohashi kala uupyakandhi kaanona yahala okutsikila eilongo lyawo kiiputundhilo yopombanda.
“Nonando katu na oshimaliwa sha gwana okufutila aanona mboka omvo aguhe, otwa hala okuya yambindhindha okwiishangitha opo ya vule okukakonga natango omayakulo kehangano lyokukwathela aanasikola noshimaliwa,” ta ti ngaaka.
Nakandungile okwa ti, oshimaliwa shoka taya ka yambindhindha nasho, otashi zi moshiketha shawo, sho taya ka kaleka iinyangadhalwa yilwe opo oshimaliwa shi yambindhindhe aanona yeli mompumbwe.
“Otatu ka yambindhindha ashike mboka yeli mompumbwe unene. Omandhina otaga ka ishangithwa koombelewa dhookansela miikandjohogolo,” ta fatulula ngaaka.
Ta ti, ookansela oyo taya ka hogolola sha ikolela konkalo tayi etitha olukeno oshowo mboka yeli lela mompumbwe.
Ta gwedha po ta ti, oye na ohokwe okuyambindhindha kehe gumwe a pumbwa omakwatho okukatsikila eilongo lye, ashike oshimaliwa itashi gwana okufutila kehe gumwe.
“Omimvo dha piti otwali twa yambindhindha mboka ya nyengwa. Elalakano okuyambindhindha aanona ya ye komeho neilongo lyawo,” ta ti ngaaka.
Yamwe oya shunithwa monima omolwa onkalo yoshimaliwa kaayi po, omanga yeshi pondola mongundu ya hugunina.
Uupyakandhi mboka owo tau kondjithwa okukandulwa po.
Nakandungile okwa ti, oshimaliwa shoka itashi ka gandjwa momukalo gwomukuli, ihe otashi yambindhindha ashike.
Ta ti, mboka taya kaninga omayindilo naya kale ya tambulwa nale kiiputundhilo yopombanda mbyoka ya dhidhilikwa no yina epitikilo lyelongo.
“Otatu kumagidha kehe ngoka taka ninga omaindilo a kale e na ombapila tayi kwashilipaleke kutya oya tambulwa shili koshiputundhilo sho ntumba oshowo oombapila adhihe tadhi pulwa, opo ya mone omayambindhindho ngoka,” ta ti ngaaka.
Omaindilo ngoka oga tameka nale no taga ka hula momasiku 21 gaFebuluali nuumvo.
Ta ti, aakalimo ashike yomoshitopolwa shaShana ya pitikwa okuninga omaindilo ngoka. - vkaapanda@nepc.com.na