Aakalimo yokomindhingoloko dhokuumbugantu hoka kwa talika ko onga omahala guulithilo otaya nyenyeta mboka taya ikuthile omahala yoyene shoka tashi ka eta embugaleko oshowo emanepo lyomahala gokulithila iimuna. Simon Shavuka gomoshikandjohogololo Uuvudhiya okwa nyenyeta kutya mboka ye na oohambo komakuti hoka, ihaya tala yakwawo, oya hala ashike omahala ga kale gawo oyo ayeke.
“Oyendji oyi ihole yene, ihe inaya ndhindhilika kutya ngele to hilile ehala kungoye mwene omanga wu na nale, oto manene po wo yakweni mboka taya ka hala omahala guulithilo monakuyiwa,” ta nyenyeta ngaaka. Ta ti, oshigwana nashi ilonge okugwanenwa, oshoka okwi ihola mwene ihaku humitha omuntu komeho, ashike ohaku eta eshono monima.
Ngoloneya gwoshitopolwa shaShana Elia Irimari pamwe nookansela yiikandjohogololo moshitopolwa shaShana okwa li ya kundathana nkene ye na okugamena omahala guulithilo.
Ookansela esiku ndyoka ya li ya ningi oshigongi shoka, okwa li ya totha mo omaupyakadhi taga mbugaleke omahala gwomaulithilo moshitopolwa shaShana, shoka tashi ka kala uupyakadhi kaanafaalama niimuna yawo, uuna ondjala ya thiki ko.
“Natu hulitheni po okwiihola mwene. Oohambo otadhi tsikilwa kehe esiku, mpoka wa li wa ende ohela hapo to ende nena oshoka ehala olya tendwa ko nale. Itaya dhilaadhila yakwawo ihe otayi iningile paulwawo,” Ngoloneya ta ti ngaaka.
Ta ti, oshitopolwa ‘shaShana’ osha vundakana, naakalimo naya kuthe oshiholelwa koshitopolwa shaNdonga, oohambo dha wapala dhi li melandulathano.
Ookansela natango oya popi kombinga yomulilo ngoka gwa li tagu dhana onkandangala omumvo gwa yi unene momudhingoloko gUuvudhiya.
Irimairi okwa ti, epangelo okwa li lya longitha oshimaliwa oshindji kombinga yepeya. “Otatu kutha onkatu yomeenedelelo okuyanda omaupyakadhi ga tya ngaaka,” ta popi ngaaka.
Omunambelewa gwokoshikondo shuuministeli wiikwambuga okwa li a kumagidha ookansela ya tameke okugandja omalongo okupitila miikundaneki ayihe oshowo okupitila mooyene yoohambo opo oshigwana shi hulithe po okumbugaleka.
“Otwa li twa ndhindhilike kutya oshigwana kashi uvite ko esimano lyokukaleka po omwiidhi mombuga.
Ethimbo limwe oto adha aanahambo taya fike owina molwomatompelo ga yooloka,” ta ti ngaaka. Ta gwedha po ta ti, oshigwana nashi kale tashi opaleke ominkulo dhomagumbo gawo, okuyanda omulilo gu fike sigo omomagumbo, uuna uupyakadhi woludhi ndoka tawu holoka. vkaapanda@nepc.com.na