Victoria Kaapanda

Opolisi moshitopolwa shaShana oya kumagidha oshigwana shi kale tashi londo ootakisi ndhi na omandhindhiliko ngoka taga vulu okulandulwa kopolisi uuna pwa holoka sha.

Ndhoka okwali dha popiwa komukuluntu gwopolisi moshitopolwa shaShana Naftal Lungameni Sakaria, sho ali a pulwa a tye ko sha kootakisi dhiifundja ndhoka tandhi yugu aantu iinima yawo. “Otwa lopotelwa oshigwana tashi yugwa iinima yawo ngele taya lefa ootakisi. Ootakisi ondhindji kadhili moshili onkene aafuthi otaya longitha ompito ndyoka okuyuga oshigwana omaliko gawo,’’ ta ti ngaaka.

Aantu oyendji miitopolwa yokonooli, inaya mangulukila we okulonda ootakisi omolwa aafuthi mboka taya  longo onga aahingi yootakisa, nelalakano lyokuyuga oshigwana.

“Oshigwana nashi kale aluhe sha kuthako uuyelele awihe tango omanga inaaya londa , mboka tu vulu okulongithwa kopolisi, oshoka olundji ohaya longitha oonomola ndhiifundja,’’ ta kumagidha ngaaka. Ondoolopa ndhomo nooli Ondangwa, Oshakati nOngwediva odha lopotwa ndhina aafuthi taya longitha oompito adhihe okuyuga oshigwana iinima yawo.

Opolisi moshitopolwa shaShana oya lopota oshiningwanima shoka sha holoka omwendhi gwayi  sho omulumentu gumwe nomukiintu ya londo otekisa okuza kOngwediva yuuka kOshakati, noku yugwa iinima yawo.

Otaku hokololwa kutya sho kwa li ya lefa noku londa ohauto ndyoka, okwa li yaandha aafalelwa yiifundja mohauto ye li yaali, gumwe okuli komeho omanga gumwe eli konima.

Ta yiti, ngoka eli komeho okwali iipopitha mongondhi, ta popi kutya otaka pitula iinima ye, kopate ndyoka yuuka kOshinyandhila.

Ya hokolola kutya, sho kwali ya hingi oshinano oshile kashona okuza mOshakati okwa li ya mono ohauto ya kankamekwa, naalumentu mboka yaali okwa li ya nukamo mohauto ya homata oombele pomake. Otaku hokololwa kutya okwali ya pulwa ya gandje ashihe yena, okuza koowili ndho kiikeho, oongaku oshowo oongondhi ndho peke.

Opolisi oya ti, okwa li ye ya pula yiitumine oshimaliwa koongondhi ndhawo. 

Omulumentu anuwa okwali a tumu N$850 ndyoka oyo ashike yali ko, omanga kombanga yomukiintu ka kwali kuna sha.

Anuwa aantu mboka itaye ya ndhimbulukwa kiipala ka kele kwaangoka ali nayo konima.

– vkaapanda@nepc.com.na