New Era Newspaper

New Era Epaper
Icon Collap
...
Home / Oshigwana sha kumagidhwa shi longithe oshimaliwa nawa pethimbo lyefudho

Oshigwana sha kumagidhwa shi longithe oshimaliwa nawa pethimbo lyefudho

2022-12-14  Victoria Kaapanda

Oshigwana sha kumagidhwa shi longithe oshimaliwa nawa pethimbo lyefudho

Victoria Kaapanda

Aanyasha Aanamibia oya kumagidha oshigwana opo shi kwate nawa oshimaliwa ethimbo lyaDesemba, okuyanda omaupyakandhi goshimaliwa petameko lyomvula.

Oyendji ohaya kala ya taalela uupyakadhi mboka, omolwokwaakwata nawa oshimaliwa ethimbo lyokili.

Aanyasha ya yooloka yomOshakati oya li ya gandja omatompelo nomakumagidho gawo nkene oshigwana shi na okukwata oshimaliwa sha sho pethimbo ndika.

Kathrine Shikongo omupandi gomosalona  mOshakati, okwa popi ta ti ohashi vulu okukala oshidhigu okuteta omusholondondo gwaashoka wa hala, omolwoshimaliwa shoka omuntu a mono pethimbo ndika lyaDesemba.

“Iilonga oyindji ohayi gandja oshimaliwa sha gwedhwa po kombanda yondjambi ndjoka yokomwedhi haya mono shito,” ta ti ngaaka. Ta ti shoka ohashi ya tula moondjo, oshoka ohaya ka iyadha kaaye na oshimaliwa shokushuna kiitopolwa hoka haya kala oshowo  kaaye na iikulya momagumbo.

Ta gwedha po ta ti, onkalo ndjoka ohayi thindile oyendji moondjo, nonando tayi vulu okuyandwa kuyele. “Nonando ethimbo ndika lyokili olya tali ka koonga ethimbo lyoku gandja, okupaathana oshigwana nashi ilonge okukwata nawa iimaliwa, no kwiihupithila po,” ta  kumagidha ngaaka.

Ta ti, ethimbo ndyoka lyaJanuali olyo hali kala aanona taya yi koosikola oshowo yamwe yu uka kiiputudhilo  yopombanda ya yooloka.

Samuel Shinedima omuhingi gotekisa ngoka ha shingile pokati kOndangwa nOshakati okwa ti onkalo ndjoka oyi na okukala ya longa oyendji omikalo, noye na okukala ya dhimbulula kutya okulongitha oshimaliwa kwa pitilila ohaku ya etele uupyakadhi petameko lyomumvo.

“Out na omanyanyu haga pitilile, sigo twa ka longitha oshimaliwa kiinima kaayi na oshilonga, netompelo anuwa, oDesemba,” ta ti ngaaka. Shinedima ta ti, oshimaliwa shoka owe shi gongela omvula ayihe, ihe oto shi longitha muule womasiku omashona, to shi longitha miinima yowala.

“Okulongitha oshimaliwa, okwiinyanyudha kaku na uupyakadhi, ihe okulongitha oshimaliwa sha pitilila ngaashi momalovu osho hashi eta uupyakadhi,” ta ti ngaaka. Festus Alweendo, omunambelewa gomayalulo giiniwe okwa kumagidha nkene oshigwana shi na okulongitha oshimaliwa nawa pethimbo ndika.

“Okutalelapo omahala ga yooloka naakwanezimo oshinima oshiwanawa, ihe natango oku kala momagumbo noku tyapula okili pamwe naakwanezimo okuli nawa shi vulithe okukafuta omahala oshowo okulanda ikulya yopokathimbo,” ta kumagidha ngaaka. “Shoka osha ikolelela kaantu kutya otaya longitha ngiini oshimaliwa opo yaka talelepo omahala gamwe, taya vulu okwiihupithi lapo oshimaliwa shoku ya yambindhindha komeho,” ta ti ngaaka.                                                         

Saima Ndikwetepo  ngoka ha landitha uukuki komeho goNambango mOshakati, okwati Desemba keshi ehuulilo lyuuyuni. “Oyendji oya tala ko omwendhi ngoka gwafa inaagu fa oomwendhi oonkwawo, ihe kapena eyooloko. Aguste nago omwendhi gwefudho, ihe aantu ihaya zimo yena omaupyakandhi gafa gomuDesemba,” ta popi ngaaka. Ta kumagidha ta ti, oshimaliwa nashi longithwe shoka shina okulongithwa, ihe ha kehe shoka to mono sheya komeho goye oshoka anuwa omwenyo nagu pewe shoka tagu pula, pethimbo lyokili.

vkaapanda@nepc.com.na


2022-12-14  Victoria Kaapanda

Share on social media