Kansela woshikandjohoololo shEenhana Olivia Hanghuwo ota ti oshikandjohoololo shaye okwa didilika sha taalela omashongo ahapu ngaashi oshimaliwa shokukwafela ovanyasha va ninge eepoloyeka davo, eepate, omeva, noikulya yokupa oshiwana nosho tuu.

Meenghundafana a ninga naKundana Hanghuwo okwa hokolola ta ti oshiwana ohashi mbomboloka shi li momwaalu muhapu tashi nyenyeta sha hala oikulya, omanga ovanyasha ohava kala tava pula oshimaliwa opo va tameke okuninga eepoloyeka davo.

Hanghuwo okwa ti oshi li eshongo lakula unene shaashi ombelewa yaye kai na eshi tai ningi po shaashi kape na sha oshimaliwa.

“Omunhu ngeenge okwe ya kombelewa yange ta kwena ondjala ohandi longifa oshimaliwa sha dja mondjato yange mwene opo ndi landele ovanhu oikulya ngaashi oukutu woufila noshivelelwa,” Hanghuwo ta ti.

Kansela okwa yelifa ta ti ombelewa yaye inai mona nande omakwafo asha a dja kepangelo ngaashi oikulya ei li hai pewa ovanhu koikandjohoololo imwe.

“Ovanyasha vahapu ove na ehalo lokuninga eengeshefa davo, nokuninga eepoloyeka da yooloka ashike kape na oshimaliwa shoku va kwafela. Onghee ohandi indile moshiwana ngaashi ovanangeshefa novaleli vopapolitika opo va yambidide ovanyasha ava nakashona ve na po,” Hanghuwo ta ti.

Hanghuwo okwa popya yoo vali ta ti ovanhu vahapu ove na omhumbwe youpangelo shaashi ohava ende eendjila diledile tava ka konga ouhaku kokule neenghono.

“Unene tuu ovakulupe novakainhu ava ve li momateelelo ovo vamwe va kumwa koshikumungu eshi shomhumbwe youpangelo. Efimbo limwe ohandi longifa otuwa yange mwene opo ndi kwafele oshiwana shi kale sha ka mona ouhaku koipangelo,” Hanghuwo ta ti.

Okwa hokolola ta ti eepate nado odi li unene eshongo lakula unene tuu komikunda edi di li kokule.

Hanghuwo okwa ti kukeshe ou e na ehalo lokukwafela ovanyasha ile a hala okuyandja oikulya okwa tambulwa ko opo a kale a kwatafana nombelewa yaye efimbo keshe.

Okwa kunghilila ovanhu ava ve na ehalo lokukatunhilwa ombuto yoCovid-19 opo ve shi ninge osheshi omukifi ou owa nyika oshiponga neenghono, yee ta ti oshiwana nashi liufe komalombwelo aa a tulwa po.