Omukulunhuwiliki moShakati wehangano lokuyandja ohonde loNamibia Blood Transfusion Services Thomas Angula ota hokolola ta ti oshikonga shokuyandja ohonde meefikola dokonooli otashi ende nawa.
Okwa ti ovanafikola vahapu otava holoka momwaalu munene ngeenge tava ka yandja ohonde.
Pefimbo a ninga eenghundanafana naKundana Omaandaxa, Angula okwa popya ta ti ehangano lokuyandja ohonde ola tamekele noshikonga shokuyandja ohonde meefikola petameko laSepetemba, omo kwa li va tameka neefikola di li nhatu.
Angula okwa ti elalakano loshikonga eshi opo ovanafikola va kale ve na eudeko kombinga nghee sha fimana okuyandja ohonde.
Okwa ti okwa teelelwa ovanailonga vehangano lokuyandja ohonde opo va kale va talela po eefikolo da yooloka dokonooli, omo ovanafikola tava ka yandja ohonde.
Okwa denga omufindo ta ti omalandulafano oCovid-19 okwa tulwa po efimbo keshe ovanafikola tava ka yandja ohonde, onghee ovadali inava pumbwa okukala va limbililwa kombinga younona wavo.
“Mopaife ngaha otwe lipyakidila neefikola domoshitukulwa shaMusati, omo twa tameka nale nosekundofikola Shaanika Nashilongo. Otwa didilika omalihumbato ovanafikola awa unene shaashi ovanafikola ohava kala ve li melandufano pefimbo tave u ya okuyandja ohonde,” Angula ta ti.
Angula okwa yelifa ta ti ovanafikola ve na eedula 16 -17 otava kala va kalelwa po kovakulunhu vavo pefimbo tava ka yandja ohonde shaashi inava fika okukala ve likalela po vo vene, omanga ovanafikola ve na eedula 18 oku uka pombada otava dulu okukala va yandja ohonde shaashi eedula davo oda wana okulikalela po.
“Oshikonga eshi otashi kala sha ningwa koitukulwa ya yooloka moshilongo, omo eefikola tadi kala da talelwa po kovanailonga vehangano lokuyandja ohonde opo ovanafikola va kale va yandja ohonde,” Angula ta ti.
Okwa kunghulila ovadali novahongifikola opo va kale tava longo ovanafikola kombinga yefimano lokuyandja ohonde shaashi eshi otashi tu ovanafikola omukumo va kale ve na ohokwe yokukala tava yandje ohonde.
Angula okwa ti ohonde oya fimana kovanhu ve li momhumbwe yohonde, onghee okuyandja ohonde osha fimana unene osheshi otashi xupifa eemwenyo dovanhu.
Ngaashi naanaa kwa didilikwa kutya ehangano lokuyandja ohonde ola taalela omhumbwe yohonde inayi wana moshilongo, Angula kwa weda po ta ti endiki lavo lokuyandja ohonde eli li li kendiki lomangeshefelo loGwashamba mOndangwa ohali longo Etivali keshe okudja potundi 10h00 fiyo 17h30.
Onghee hano okwa kunghulila oshiwana opo shi kale hashi talele po endiki lokuyandjela ohonde lomOndagwa, opo shi dule okukala sha yandja ohonde.