Victoria Kaapanda

Oshipangelo shaNandjokwe osha ningi shotango okukala neshina lyokuminikila meni lyolutu, okuminikila omikithi dha yooloka tali ithanwa “endoscpy tower”.

Eshina ndyoka okwa li lya gandjwa kehangano lyoDebeers Marine lyongushu yomilliona N$1,3 Etine, mOndangwa.

Omupevi minista gwuundjolowele Esther Utjiua Muinjangue  esiku ndyoka sho a li a taamba ko eshina ndyoka peha lyuuministeli okwa ti,  eshina ndyoka olyo limwe lyi na oshilonga notali ka dhana onkandangala ombwaanawa monkalamwenyo dhaanuumvu oshowo okuninga iilonga yaapangi iihwepo.

“Eshina ndika otali eta omalunduluko muuministeli wetu wuuhaku, oshoka aantu itaya ka thigwa niilwadhi komalutu. Aanuumvu otaya ka lalekwa mbala moshipangelo,” ta ti ngaaka.

Ta ti, eshina ndika otali kwathele aanuumvu kaaya kanithe ombinzi oyindji ethimbo lyetando, ompito yokukwatwa komikithi dhilwe oshowo uuwehame ngele taya minikilwa meni.

Muinjangue okwa popi esiku ndyoka ta ti oshipangelo shaNandjwekwe osho ashike shi na eshina ndyoka miipangelo ayihe moNamibia alihe.

“Iipangelo yilwe yepangelo ohayi tumu aanumvu yamwe  kiipangelo yopawumwene. Otatu pandula sho oshipangelo shimwe shetu sha kwathelwa okupewa eshina lyongushu kehangano lyoDebeers Marine,” a popi ngaaka.

Omukuluntu gwoshipangelo shepangelo shaNandjokwe  ndohotola Akutu Munyika okwa ti, oya pandula noonkondo oshoka oya ningi ethimbo ye li mompumbwe  nokulonga nuudhigu ngele tashiya ketango.

Munyika ta ti, oya kala haya longitha okashina hoka haka tulwa meni lyolutu lomuntu opo a minikilwe momandjandja, ndyoka kwa li lya hulu okulonga mo 2017.

Omukuluntu gwehangano lyoDebeers Marine okwa ti, oya li ya gandja eshina ndyoka okukwathela oshipangelo shi yakule aanuumvu yawo momukalo gwoshinanena.

“Ehangeno lyetu otali tsikile okukwathela pompito adhihe tali vulu oshowo mpoka pena ompumbwe onene,” a popi ngaaka.