Oshilyo shomutumba gopashigwana Mondestus Amutse okwayambindhindha osikola Omagalanga niipundi yosikola.
Osikola omagalanga combined oyili okilimota ooshoan okuza mOshikuku moshitopolowa shaMusati. Amutse okwalanda iipundi yi vule po30, yongushu yoshimaliwa shi thike N$20 000.
Ta ti, okwali aningi ethimbo ta gongele oshimaliwa shoka, sigo agwanitha okulanda iipundi mbyoka, ihe hapo a huulile mpoka.
“Onda yambindhidha osikola ndjika nokashona hoka nda mono, okuthitika oombululu ndhimwe nando haadhihe,”ta ti ngaaka.
Amutse esiku ndyoka okwapopi ta ti, elongo olyasimana, onkene aalongwa ngele taya yambindhindhwa, nayo otaya itulamo meilongo lyawo.
“Otandi kumagidha aalongwa ayehe ya itulamo melongo lyawo, etaya etha oondjila dha mbwalangandja,” ta kumagidha ngaaka.
Tagwepo ta ti, okwahala okutseyithila aalongwa kutya, onakuyiwa otayi kapula elongo, onkene ngele otaya dhanene elongo mongaashingeyi, nena otaya dhanene onakuyiwa yawo.
Amutse okwakumagidha aalongwa una ya yi kiiputundhilo yopombanda, ya kale taya kutha iilongwa mbyoka tayi ya monitha iilonga mbala konima ye yi elongo lyawo.
“Uupyakandhi mboka owa gongela aanyasha momagumbo, molwa inaaya mona iilonga. Shoka osha etwa kethimbo ndika tuli, tali longitha uutekinondji, iilonga oyindji otayi longwapo kuutekinika wopaungomba,” ta ti ngaaka.
Omukuluntu gosikola Thomas Linus okwati, okwapandula komagano giipundi.
“Otwa kala twa taalela uupyakadhi unene, tuna aalongwa taya kuutumba pevi omanga yamwe ya thikama omanga taya longwa,” ta pandula.
Ta ti, iipundi mbyoka otayi keeta elunduluko mosikola yawo.
Omukuluntu sikola natango okwati, oyena omaupyakandhi gamwe ga taalela osikola, na kehe ngoka natango taka kwatwa ohokwe yokuyambindhidha osikola ndjoka, neshininge owala.
Aanisikola esiku ndyoka kwali natango ya pewa oonzapo, okwali ya pandula wo sho ya mono iipundi iipe.
Omunasikola gumwe eli mondondo ontihamano okwali a popi kutya, otaya ka kwata nawa iipundi yawo, opo yi kale po ethimbo, yi ye wo natango yi kwathele aalongwa taye keya posikoloa mpoka.