Amushangandjayi gwongundu tayi pangele Sophia Shaningwa okwa ti, kaku na oongundu mbali dhoSwapo, ihe oku na ashike oSwapo yimwe.
“Oku na ashike ongundu yimwe yoSwapo, ndyoka kwa li ya lelwa tango komukokoli goshilongo shaNambia Sam Nujoma,” ta popi ngaaka.
Ta ti, mboka natango ya dhama moongundu mbali dhoTeam Swapo nenge Team Harambee, naya penduke.
Shaningwa ndhoka okwa li e dhi popi esiku lyetyapulo lyemanguluko lyoshilongo, kwa li lya ningwa Olyomakaya ga zi ko momukunda Omhakoya momudhingoloko gOutapi.
“Ngele Aakwaswapo kakwa li ya hangana ngeno ongundu ndjika oya teka po, onkene otandi kumagidha tu hanganeni nokulongela kumwe opo tu yeni komeho,” ta kumagidha ngaaka.
Ta pula kutya ngele Swapo okwa teka po aanona yaNamibia monakuyiwa otaya ka uka peni?
Ta ti, shoka sha pumbiwa okuhangana ashike.
“Natu hanganeni, tatu longeleni kumwe. Tse inatu hala Swapo a teke po, no inatu hala ooSwapo yaali,” ta ti ngaaka.
Oongundu ndhoka mbali dhoSwapo okwa li dha totwa mo2017, sho oTeam Harambee ya li ya kwatelwa komeho kaaleli aakuluntu ngaashi Hage Geingob, Sophia Shaningwa, Netumbo Nandi-Nadaitwah oshowo nakusa Marco Hausiku.
Omanga Team Swapo ya li ya kwatelwa komeho kuNahas Angula, Jerry Ekandjo, Armas Amukwiyu, Pendukeni Iivula-Ithana, Petrina Haingura oshowo Helmut Angula.
Shaningwa esiku ndyoka natango okwa li a kumagidha aanona ya itule mo meilongo lyawo, yo ya hulithe po oondjila inaadhi uka.
“Inamu landula iikolitha niingangamithi, otayi yonagulapo oonkalamwenyo dheni, ihe tuleni eyilongo komeho opo muka ninge oondohotola oshowo aahingi yoondhila,” ta kumagidha aanona.
Ta gwedhapo kutya, ngele opena mboka taye mu hekele iingangamithi ya lopoteni mbala opo ya longiwe nayo, ina mulanditha po oshilongo sheni yene.
“Iikolitha nomalovu ohayi yonagulapo oonkalamwenyo dhaantu, onkene kutheni onkatu ndyoka yi li mondjila opo mulongekidhe onakuyiwa yeni,” ta popi ngaaka.
Kansela goshikandjohogololo shOutapi Immanuel Shikongo okwa ti, oya li ya tyapula esiku ndyoka okundhimbulukwa esiku ndyoka lya simana lyoshilongo.
“Otu li mpaka nena omolwa ta tu tyapula nokundhimbulukwa emanguluko lyoshilongo shetu, se natango ta tu dhimbulukwa aamwameme nookume mboka kwali ya kanithile oomwenyo dhawo miita,” ta popi ngaaka.
- vkaapanda@nepc.com.na