New Era Newspaper

New Era Epaper
Icon Collap
...
Home / Oukwanyama nOndonga ekuvu nela

Oukwanyama nOndonga ekuvu nela

2022-04-12  Victoria Kaapanda

Oukwanyama nOndonga ekuvu nela

Victoria Kaapanda

Nashi kale sha shiwika nawa kutya Oukwanyama nOndonga ekuvu nela. Ndhoka okwa li dha popiwa komukwanilwa gwOndonga Fillemon Shuumbwa Nangolo Olyomakaya pethimbo a talele po Elenga enene mOukwanyama Gerge Nelulu.

Omukwanilwa okwa li a kutha oshendo sho wina opamwe nomalenga omanene nomashona gomOndonga, yaka talela po omunashipundi nale gwelelo lyOukwanyama, komukunda Etomba moshitopolwa shaHangwena.

Nangolo okwa li a tambulwa ko kengathithi lyaakalimo yomOukwanyama nenyanyu.

“Oyendji oye na omayipulo kutya oshike nda thiki mpaka nena. Onda thiki putate, otandi mwiithana tate oshoka oye kwa li a langeke ndje sho nda ningi omukwaniilwa,” ta fatulula ngaaka.

 Nangolo ta ti, elalakano okukaleka po uukuume mboka wazi nale pethimbo lyaakwanilwa yotongo, mboka kwa li taya lele iilongo mbika iyali.

“Ombili nohole nayi pangele pokati kiilongo mbika iyali, ngaashi naana ya kala, yo nayi tsikile sigo aluhe,” ta popi ngaaka.

Omukwanilwa okwa popi kutya, okuza kuushona we, ka kwa li eshi eyooloko po kati komalenga gOndonga nomalenga gOukwanyama oshoka okwa li haga kala pamwe ethimbo
alihe.

“Shoka tashi ulike kutya ohole nombili, oya zi nale,” ta ti ngaaka.

Aantu okwa li ya ligola, taya ulike enyanyu no ya li ya pulakene ondjokonona nkene aakwanilwa yo tango ya li ya kala mekwatathano.

Nelulu okwa ti, ondjokonona onde, no itayi pu okupopiwa, ohole pokati kiilongo mbyoka oyina okutsikila sigo aluhe.

“Nangolo okwalandula moonkatu dhahekulu  nakusa omukwanilwa Immanuel Elifas, ngoka ka kwa li nando hapumo megumbo lyandje, ihe ondishi wete kutya okwathigulula po ombepo ombwaanawa ya hekulu,” ta tanga omukwanilwa.

Ta ti, omukalo ngoka na tsikile nago, opo kukalekwepo ayihe ya thigwa ko nale kaakuluntu.

“Onda uva nawa, onda pandula no ndiinekela omukwanilwa naye okuuva nawa sho twa uhala pamwe nokuhokolola shoka sha li sha etwa po nena,”ta pandula ngaaka.

Caption: Omukwanilwa gwOndonga Fillemon Shuumbwa Nangolo a talele po limwe lyomomalenga omanene mOukwanyama George Nelulu momukunda Etomba moshitopolwa shaHangwena.

Ethano Victoria Kaapanda

vkaapnda@nepc.com.na


2022-04-12  Victoria Kaapanda

Share on social media