New Era Newspaper

New Era Epaper
Icon Collap
...
Home / Ouministeli woikwamina nao owa taalela omashongo oCovid-19

Ouministeli woikwamina nao owa taalela omashongo oCovid-19

2021-07-14  Festus Hamalwa

Ouministeli woikwamina nao owa taalela omashongo oCovid-19

Ouministeli woikwamina neenghono nawo owa kumwa konghalo yeliko la ya pedu omolwa yombuto yoCovid-19 

Omupopiliko mouministeli ou Andreas Simon okwa hokolola ta ti ouministeli wavo ihau longo vali nawa ngaashi shito shaashi ovanailonga vamwepo ova kwatwa komukifi woCovid-19. Ta ti eshi osha eta opo oministeli ikale tai yandje omayakulo taa ende nakashona mopaife.

Okwa hokolola ta ti oministeli yavo oi na oshinakuwanifa shoku longa needjo domedu ngaashi okawe, noikwanghono ashike pefimbo eli lomukifi ou, oilonga yavo oya iwa moshipala

“Oministeli yetu oina oilonga oyo hai pula ovanambelewa opo va ye kondje yombelewa vo vashiive va ka ninge omapekapeko ounongononi keenhele dayooloka moshilongo. 

Onghee mopaife ngaha ohatu longo noudjuu shaashi iha tu i vali kondje yombelewa shaashi otwa tila okukwatwa kombuto ei. Mopaife ngaha otu na noilonga ili konima ina i pwa okulonga,” Simon ta ti.

Okwa yelifa kutya ova ninga onghendambala opo ovanailonga vamwe va longele komaumbo pefimbo eli. Onghee eshi oshe va pa opo va kale ve na omhumbwe yovanailonga shaashi vahapu ita va longo vali nawa ngeenge veli komaumbo. 

Onghee okwa ti paife oilonga oya ninga ihapu unene kwaava tava longo kondje yombelewa shaashi nomwaalu wavo owa ngambekwa.

Okwa ti ovanailonga ihava ende vali tava i koitukulwa imwe po ngaashi sha kala shito, onghee paife eshi osha eta opo olopota domapekapeko ounongononi womadu noikwanghono, nomalulo okwa shuna pedu neenghono.

Ta weda po kutya ouministeli wavo ina u lopotelwa nande omunailonga a fya koCovid-19, ashike okwa kwatwa ovanailonga veli 50 kombuto ei.

Okwa kumaida yoo oshiwana opo shi kale tashi dengele keengodi davo dopambelewa ungeenge sha hala omayakulo, ta ti oministeli yavo oye lilongekida opo ikale tai yandje omayakulo koshiwana nopefimbo eli lidjuu loCovid-19. 

“Ouyelele muhapu ouli komapandja etu opaungomba, onghee oshiwana nashi talele po epandja letu,” Simon.


2021-07-14  Festus Hamalwa

Share on social media