Festus Hamalwa

Oumisteli woukashike kookanhu nonghalonawa yokaana owa tameka nopolongalama yanuninwa ovakalimo vomomukunda Onamatanga moshitukulwa shaMusati, veli moluhepo. Ava otava ka pewa oshimaliwa shi fike N$600 oule weemwedi nhatu. Ouministeli ou otwa tota po opolongalama ei opo ikale tai kwafele ovanhu veli momhumbwe yoikulya.

Moshipopiwa shaye minista Doreen Sioka okwa popya ta ti ouministeli wavo otau lalakanene opo u lwife ondjala noluhepo moshilongo nokukwashipaleka kutya ovanhu veli momhumbwe yoikulya ova pewa omakwafo.

Minista okwa ti oshimaliwa eshi sha pewa ovanhu otashi ka longifwa oku landa oikulya yomeumbo nosho tuu oipumbiwa ikwao ya wedwa po ya fimana. “Ouminiteli woukashike kookanhu ouna ondjodi opo u kale wa kwashipaleka kutya kape na Omunamibia ta kala ena omhumbwe yoikulya, onghee ouministeli wetu otau kala tau yandje oshimaliwa N$600 keumbo keshe oule mweemwedi nhatu fiyo Okotoba,” Sioka ta ti.

Sioka okwa kunghulila oshiwana opo shi longife oshimaliwa eshi pamukalo muwa, ndele haku landa omalodu, onghee okwa ti omunhu keshe ta ka monika ta longifa oshimaliwa eshi momalodu ouministeli otau ka xulifa po oku yambiddida omunhu ou.

Okwa popya yoo vali ta ti kutya ovakalimo moshitukulwa shaKhomas navo ota ka pewa omakwafo oshimaliwa N$600 moule weemwedi nhatu.

Oshimaliwa eshi osha dja kehangano loEuropean Union olo tali lalakanene oku yambidida oilongo yaAfrica tashi pitile pamukalo wokukondjila ondjala.

“Ohandi pandula omukalelipo shilongo moNamibia wehangano loEuropean Unino Sinikka Antila eshi ena ekwatafano liwa noshilongo shetu nokukala yo akwashipaleka kutya Ovaanamibia veli momhumbwe yoikulya ova pewa omakwafo,” Sioka ta ti.

Moshipopiwa shaye omukalilepo shilongo woEuropean Union moNamibia Sinikka Antila okwa ti okuudite etumba eshi ehangano loEuropean Union olo lotete okukala tali yandje oshimaliwa N$600 kovakalimo veli momhumbwe yoikulya moNamibia.

Okwa ti ehangano eli otali twikile nokukala lina ekwatafana liwa naNamibia opo va kale tava longele kumwe mokukondjifa ondjala noluhepo.

“Ondjala oyo yimwe ya didilikwa tai dana onghandangala moNamibia unene tuu komikunda nokomalukanda omeedoolopa, onghee ombelewa yetu yehangano loEuropeana Unino oya kala nokudidilika oshiwana shi li momhumbwe yoikulya naashi oshe tu pa opo tu yambidide ouministeli noshimaliwa opo u dule oku yambidida ovanhu veli moluhepo,” Antila ta ti.

Okwa yelifa ta ti ovanhu veli 27600 otava ka kala tave pewa oshimaliwa shi fike N$600 moule weemwedi nhatu moitukulwa ivali shaMusati noKhomas.