Omukulunhuwehongo moshitukulwa shaHangwena Isak Hamatwi ota ti ovahongi moshitukulwa shaye nava yandje eetundi dawendwa po kovanafikola.
Ngaashi naana kwa didilikwa kutya eefikola okwa li da ya mefudo lile molwoo ombuto yoCovid-19, Hamatwi okwa ti ovahongi nave li tule mo pefimbo loshikako shaxuninwa opo vakwashipaleke kutya ovanafikola otava kapita noindjemo oiwa kexulilo lomudo.
Meenghundafana a ninga naKundana Hamatwi okwa hokolola ta ti kape na vali efimbo lokuhepifa shaashi oilongwa yovanafikola oili konima neenghono, omanga vali okwa teelelwa eendodo onhi 10, 11, nonhi 12 opo di kale dahovela nomakonakono ado a kula axuninwa. Onghee Hamatwi ota kunghulile ovahongifikola opo va kale tava yandje eetundi dawedwa po kovanafikola unene eendodo edi tadi ka tameka omakonakono tete.
Okwa ti ovahongifikola i na vahepifa nande efimbo paife shaashi ovapumbwa okulonga nondjungu nelitulemo opo vakwashipaleke kutya ova mana ko oilongwa yavo diva.
Okwa denga omufondo ta ti eli olo efimbo liwa kovanafikola vondodo onhi 10, 11 nonhi 12 opo velitulemo moilongwa yavo yofikola shaashi ova taalela omakonakono a kula axuninwa.
Hamatwi okwa ti kapena vali efimbo, onghee efimbo opaife lokulonga noudinini, nokutopolafana omayele.
“Ohandi kunghulile ovalongi aveshe vomOhangwena opo velitule mo moilonga yavo unene tuu ovalongi vondodo onhi 10, 11 nonhi 12 ovapumbwa okukala tava kwafela ovanafikola ava vena oupyakadi moilongwa yavo manga ina vatameka okushanga omakonakono okexulilo lomudo,” Hamatwi ta ti.
Omukulunhuwehongo okwa popya yoo vali kombinga yombuto yoCovid19 eshi ta kunghulile ovanafikola novalongifikola opo vatwikile noku liufa komalombwelo oCovid-19 aa a tulwa po fimbo keshe.
“Ovahongifikola nava yandje oshihopaenenwa kovanafikola nghee vena okulihumbata mofikola kombinga yombuto yoCovid19. Ina ndi hala ndi hange omuhongifikola eli mokati kovanafikola ina djala okalapi kaye kokomulungu, onghee oshili shafimana ngeenge omuhongifikola oye ta yandje efano liwa kovanafikola tete,” Hamatwi ta ti.
Okwa ti ombelewa yaye otai tameke oku talela po eefikola adishe domoshitukulwa opo i kale ya ninga omapekapeko kombinga yoipumbiwa yomeefikola, nokukala yoo vali va twa ovanafikola omukomo opo va longe noudidini moshikako shavo shaxuninwa.
“Onda hala oshitukulwa shaHangwena osho shikale dingi ngeenge tashi ya mokupita nawa, onghee natulongeni nondjungu nelitulemo.