Omupedu-prima minista Netumbo Nandi-Ndaitwah okwa kumaida oshiwana opo shi kale tashi yandje etonatelo lawana kounona ve na omaulema a yookoloka opo ku kelelwe hava ninge oihakanwa yomahepeko omomaumbo.

Nandi-Ndaitwah okwa ti ounona ve na oulema navo ovanhu ashike ngaashi ovanhu aveshe onghee osha fimana ngeenge tava pewa e hole nokukala ve li meameno noshoyo e hongo lopetameko ngaashi naana okaana keshe okaNamibia ke na oufemba wo kuya kofikola.

Edi omupedu-prima okwe di popya Osoondaxa pefimbo omunangeshefa Ennio Hamutenya nomudanitanga mu kulu kwa li ta yandje oshimaliwa N$100 000 kendiki Dr Fransa Indongo Special Care Centre ha li tonatele nokuyandja eetundi kounona ve na omaulema a yooloka molukanda Okandjengedi mOshakati.

Endiki eli ola kala la didilikwa li na ounona tava mono oixuna eshi vehe na oikwafifo ya wana ngaashi oipundi, oikulya, omakumbafa, eembete, okandjuwo noshoyo omilambo doikundjala kounona ovo iha va dulu oku ya kondje.

Pendiki ope na ounona 25 novanailonga ova li yambi ve li vane hava longo efiku keshe tava tonatele ounona.

Ounona ve li pendiki opo vamwe eefiye omanga vamwe ova e twa po kovadali vavo konima yeedula nanho paife ashike ovadali vavo iha va ende po vali.

Nandi-Ndaitwah okwa indila ovakwashiwana noshoyo ovaleli va yooloka opo va kale tava yambidida endiki olo shaashi ota li yandje omayakulo mawa kounona.

“Ka shipu oku li yamba totonatele ounona ve na omaulema a yooloka. Ovanailonga hava longo pendiki apa otava longo oshilonga sha fimana shaashi otava ulikile ounona o hole nokukwashipaleka kutya otava longwa oinyangadalwa yofikola,” ta ti.

Moshipopiwa shaye Ennio Hamutenya ou a yandja oshimaliwa kendiki olo okwa ti oshivike sha djako okwa mona eenghundana koNBC Tv kombinga younona tava mono oixuna vopendiki opo.

Onghee naashi osha eta opo a dule okukala a yambidida noshimaliwa opo shi dule okulongifwa okukalanda oikwafifwo ya pumbiwa pendiki.

“Ohandi lakanene okushakeneka epangelo ondjilakati onghee ohandi twikile nokuyambidida eefikola ile ovanhu momidingonoko ve li moluhepo,” Hamutenya ta ti.

A pandula, omukulunhu wendiki Dr Fransa Indongo Special Care Centre Aili Shilongo okwa ti pandula eshi va pewa oshimaliwa shaashi otashi ka eta po elunduluko la kula pendiki opo.

Shilongo okwa ti ota ka kala omutumba nangoloneya waShana noshoyo mayola wodoolopa yaShakati opo va tule omayele kumwe nghee ve na okulongifa oshimaliwa osho.

Okwa weda po ta ti keshe umwe okwa manguluka okuyambidida endiki lavo shaashi natango ova taalela omashongo a yooloka.

fhamalwa@nepc.com.na