Festus Hamalwa

Ouministeli wouhaku nonghalonawa otau ka yandja eepela dipe kounona ava veli kepango lombuto loHIV noAIDS moshilongo.  Edi oda popiwa momushangwa wa dja mombelewa yomukulunhuwiliki wouministeli wouhaku Ben Nangombe.

MuJuni neudo Namibia okwa didilika omwaalu wovanhu vefike 183576 veli kepango loHIV noAIDS, omo mwa kwatelwa ounona veli 724 veli koshi yeedula nhee.

Neudo muJuli ouministeli owa tameka nokukonga omuti woPediatric Dolutegravir (pDTG) ou tau wa palele okukala tau longifwa kounona ve na ombuto yoHIV noAIDS.

Omuti ou ota kala tau longifwa kokaana kena oivike inhee fiyo okaana kena eedula nhano. Onghee paife Namibia ota ka lundulukila komuti u pe wo pDTG, omanga omuti ou ukulu wa kala ha u pewa ounona nale itau ka longifwa vali.

Nangombe okwa ti omuti upe ouna omauwa ahapu kounona shaashi hau nuwa wa fa eepela, hau dulu oku tulwa momeva opo okaana kanwe, wo vati ounyenye opo u kale tau tuu ounona omukumo va kale tave unu nokupona noupu.

Okwa ti kutya ouministeli owe li longekida opo u kale wa yandjaneka omuti ou komandiki ouhaku moshilongo ashishe, onghee ovadali ile ovatekuli vounona vena ombuto otava indilwa opo va kale va talela po omandiki ouhaku vo va pewa omuti wounona vavo.

Okwa popya ta ti elalakano okufila oshisho ounona tashi pitile momayakulo taa yandjwa kouministeli nonande pena omashongo ombuto oCovid-19.